नगद र गरगहना चोर्ने क्रममा प्रतिवाद गरेपछि वृद्धाको हत्या, १ जना पक्राउ

नुवाकोट। नुवाकोटकी ७५ वर्षीया नेत्रकुमारी खत्रीको हत्या गरेको आरोपमा प्रहरीले एक जनालाई पक्राउ गरेको छ ।गत सोमवार राति खत्रीको हत्या गरेर फरार रहेकी शिवपुरी गाउँपालिका–६ खत्रीटोलकी सुकु तामाङलाई पक्राउ गरिएको प्रहरीले जनाएको छ ।

हत्यामा संलग्न २२ वर्षीय तामाङलाई तालिमप्राप्त कुकुरको सहायताले लुकिरहेको अवस्थामा बिहीवार पक्राउ गरिएको र अनुसन्धानका लागि बिहीवार नै जिल्ला अदालतबाट सात दिनको म्याद लिइएको जिल्ला प्रहरी प्रमुख (प्रहरी उपरीक्षक) संजयसिंह थापाले जानकारी दिए ।

'लामो समयदेखि लागुऔषध दुर्व्यसनीमा संलग्न तामाङले गाँजा खरिदका लागि पैसा अभाव भएपछि वृद्धासँग भएको नगद र गरगहना चोर्ने क्रममा हत्या गरेको स्वीकार गरेकी छिन्', उनले भने, 'वृद्धासँग लुटेको नगद र लगाएको गरगहना प्रहरीले बरामद गरेको छ ।'

वृद्धाको हत्यापश्चात लुटिएको रु ८३ हजार र उनले लगाएको सुनको एक जोडी बेरुवा र एकथान तिलहरी अभियुक्तले दिएको सूचनाका आधारमा काठमाडौंको बूढानीलकण्ठ नगरपालिका–६ च्यासिङटोलको जङ्गलबाट प्रहरीले बरामद गरेको थियो ।

'गाँजा खरिदका लागि पैसा नभएपछि तामाङले वृद्धासँग रहेको नगद र लगाएको गहना लुट्ने योजना बनाएको पाइएको छ', प्रहरी प्रमुख थापाले भने, 'नगद र गहना लुट्ने क्रममा (वृद्धाले) प्रतिवाद गरेपछि हत्या गरेको अभियुक्तले स्वीकार गरेको छ् ।'

एकल महिला र निःसन्तान खत्रीको सोमवार राति १० बजे हत्या भए पनि छिमेकीले मंगलवार मात्र थाहा पाएका थिए ।घटनापछि तालिमप्राप्त कुकुरको सहयोगले ४ दिनपछि अभियुक्त पक्राउ गर्न सफल भएको प्रहरीले जनाएको छ ।