मालपोत कार्यालयमा दलाली नियन्त्रण गर्न प्रहरीको विशेष अप्रेसन, १६ जना पक्राउ

चितवन । चितवनको भरतपुर महानगरपालिका–१० स्थित मालपोत कार्यालय परिसरमा बिचौलियाको काम गर्दै आएका व्यक्तिहरूमाथि प्रहरीले विशेष अप्रेसन सञ्चालन गरेको छ। सेवाग्राहीको फाइल बोकी अनधिकृत रूपमा दलाली कार्यमा संलग्न रहेका १६ जनालाई नियन्त्रणमा लिई अनुसन्धानका लागि जिल्ला प्रहरी कार्यालय चितवन पठाइएको प्रहरीले जनाएको छ।

प्रहरीका अनुसार मालपोत कार्यालयमा सेवाग्राहीलाई अनावश्यक झन्झट सिर्जना गर्दै बिचौलियाको माध्यमबाट सेवा प्रवाहमा अवरोध पु¥याउने गतिविधि बढेपछि निगरानी कडा पारिएको थियो। सोही क्रममा विभिन्न स्थानका व्यक्तिहरूलाई नियन्त्रणमा लिइएको हो।

नियन्त्रणमा परेकाहरूमा कालिका नगरपालिका–९ का ५० वर्षीय डीलबहादुर भण्डारीदेखि रत्ननगर नगरपालिका–८ का ३५ वर्षीय रोहित महतोसम्मका व्यक्तिहरू रहेका छन्। उनीहरू विभिन्न भू–सेवा केन्द्रसँग आबद्ध भई सेवाग्राहीका कागजात बोकी अनधिकृत रूपमा काम गर्दै आएको प्रारम्भिक अनुसन्धानबाट खुलेको प्रहरीले जनाएको छ।

प्रहरीले यस्ता गतिविधि नियन्त्रण गर्न आगामी दिनमा समेत निगरानी तथा कारबाहीलाई अझ सशक्त बनाइने बताएको छ। साथै सेवाग्राहीलाई कुनै पनि बिचौलियाको भर नपरी सम्बन्धित कार्यालयबाटै प्रत्यक्ष सेवा लिन आग्रह गरिएको छ।