मालपोत कार्यालयमा चितवन प्रहरीको आँखा!

चितवन। चितवनको मालपोत कार्यालय परिसरमा दलाली तथा बिचौलियाको काम गर्दै आएका व्यक्तिहरूमाथि प्रहरी प्रशासनले कडा कारबाही थालेको छ। जिल्ला प्रहरी कार्यालय चितवनले सञ्चालन गरेको विशेष निगरानी तथा अपरेशनका क्रममा दर्जनभन्दा बढी व्यक्तिलाई नियन्त्रणमा लिइएको जनाएको छ।

सेवाग्राहीलाई अनावश्यक झन्झटमा पार्दै छिटो काम गरिदिने नाममा अतिरिक्त रकम असुल्ने गतिविधि बढ्दै गएको गुनासोपछि प्रहरीले यस्तो कदम चालेको हो। पक्राउ परेकामाथि आवश्यक अनुसन्धान भइरहेको र दोषी देखिएकामाथि कानुनी प्रक्रिया अघि बढाइने प्रहरी स्रोतले जनाएको छ।

यस कारबाहीले मालपोत कार्यालयमा हुने अनियमितता नियन्त्रण गर्न मद्दत पुग्ने अपेक्षा गरिएको छ। प्रहरीले यस्ता अवैध गतिविधिविरुद्ध आगामी दिनमा पनि निगरानी कडा पार्ने जनाएको छ।