ओलीको रिस बादलमाथि पोखियो, एमालेभित्र नयाँ ध्रुवीकरणको संकेत

काठमाडौं । नेकपा एमालेभित्र आन्तरिक असन्तुष्टि फेरि सतहमा आएको छ । पार्टी अध्यक्ष केपी शर्मा ओलीसँग सिधा टकराव गर्न नसकिरहेका नेताहरूले अहिले संसदीय दलका नेता तथा कार्यबाहक अध्यक्ष रामबहादुर थापा ‘बादल’लाई केन्द्रमा राखेर असन्तुष्टि पोख्न थालेका छन् । 

बाहिरबाट हेर्दा निशाना बादल देखिए पनि यसको मूल केन्द्र ओली नै रहेको बुझ्न गाह्रो छैन । बिहिबार संसदमा बादलले दिएको अभिव्यक्तिपछि एमालेभित्र विवाद चर्किएको हो । उनको सम्बोधनलाई लिएर पार्टीका शीर्ष तहका नेताहरूबीच फरक–फरक धारणा सार्वजनिक भएका छन् । विशेषतः पार्टीभित्र आलोचनात्मक धार बनाउँदै आएका नेताहरूले यसलाई ओलीविरुद्द अभियान चलाउने अवसरका रूपमा लिएका छन् ।

एमालेका नेता सुरेन्द्र पाण्डेले सामाजिक सञ्जालमार्फत प्रतिक्रिया दिँदै पराजयका कारण बाह्य शक्तिमा मात्र खोज्नु गलत हुने बताएका छन् । उनले पार्टीको अकर्मण्यता र कमजोरी नै वर्तमान अवस्थाको कारण भएको संकेत गरेका छन् । उनले ‘षड्यन्त्र’का कथा सुनाएर कार्यकर्तालाई भ्रममा राख्ने प्रवृत्ति त्याग्नुपर्ने धारणा राखेका छन् ।

त्यस्तै, उपाध्यक्ष विष्णु पौडेलले बादलको अभिव्यक्ति पार्टीको स्थापित नीति र मान्यताविपरीत भएको स्पष्ट टिप्पणी गरेका छन् । उनले यस विषयमा केन्द्रीय सचिवालय बैठकमा गम्भीर छलफल हुनुपर्ने बताएका छन् । स्रोतका अनुसार, पौडेल यसअघि नै संसदीय दलको नेताको चयन प्रक्रियाप्रति असन्तुष्ट थिए र बादलको उदयप्रति पनि सन्तुष्ट देखिएका थिएनन् ।

नेताहरुको असन्तुष्टि पछि र दवावपछि एमालेले आज दिउँसो १ बजे बादलको अभिब्यक्तिमा छलफल गर्न आकस्मिक सचिवालय बैठक बोलाएको छ । महासचिव शंकर पोखरेलसँग परामर्श गरेर बादलले संसदमा धारणा राखेको बताइए पनि त्यसले पार्टीभित्रको असन्तुलन झन् उजागर गरिदिएको छ । बादलले संसदमा व्यक्त गरेका विचारमा ‘अदृश्य शक्ति’, सुरक्षा निकाय र प्रशासनिक संरचनाको भूमिकामाथि प्रश्न उठाइएको थियो, जसले पार्टीभित्रै असहजता सिर्जना गरेको हो ।

उपमहासचिव योगेश भट्टराईले पनि सार्वजनिक रूपमा पार्टीको सिद्धान्त र मूल्यबाट विचलित नहुन चेतावनी दिएका छन् । उनले जनताको बहुदलीय जनवाद ९जबज० अनुसार जनमतको सम्मान गर्दै आत्मसमीक्षा गरेर अघि बढ्नुपर्नेमा जोड दिएका छन् । सुरक्षा निकाय, न्यायालय र प्रशासनप्रति पार्टीको विश्वास कायम रहनुपर्ने उनको स्पष्ट सन्देश छ ।

एमालेका एक पदाधिकारीका अनुसार, यो विवाद केवल अभिव्यक्तिको प्रश्न मात्र होइन । एमालेभित्र नेतृत्व, कार्यशैली र भविष्यको दिशाको विषयमा गहिरो असहमति बढ्दै गएको संकेत हो । विगतमा माओवादीले प्रयोग गर्ने गरेको सहायकमाथि प्रहार गरेर मुख्य लक्ष्यमा निशाना लगाउने रणनीतिजस्तै अहिले एमालेभित्र पनि देखिन थालेको टिप्पणी भइरहेको छ ।

ओली निकट नेताहरू क्रमशः सशक्त भइरहेका बेला असन्तुष्ट समूहले प्रत्यक्ष टकरावभन्दा परोक्ष दबाबको रणनीति अपनाएको देखिन्छ । त्यसका लागि बादल सहज लक्ष्य बनेका छन् । पछिल्लो घटनाक्रमले एमालेभित्र नयाँ ध्रुवीकरणको संकेत गरेको छ । विष्णु पौडेल, गोकर्ण विष्ट, योगेश भट्टराईलगायत एक धारमा उभिँदा सुरेन्द्र पाण्डे, गोकुल बाँस्कोटा जस्ता नेताहरू पनि समानान्तर बहसमा सक्रिय देखिएका छन् ।

यसरी, बादलमाथि केन्द्रित देखिएको विवादले सारमा एमालेभित्र नेतृत्वको प्रश्न फेरि उठाएको छ । आज बस्ने पार्टी सचिवालय बैठकले यो विवादलाई कुन दिशामा लैजान्छ भन्ने कुराले पार्टीको आन्तरिक शक्ति सन्तुलन कता मोडिन्छ भन्ने स्पष्ट पार्नेछ ।