संघीयता र लोकतन्त्र रक्षाको दायित्व सबैको हो: नारायणकाजी श्रेष्ठ

गोरखा । पूर्व उपप्रधानमन्त्री नारायणकाजी श्रेष्ठले विश्व आदिवासी दिवसको अवसरमा आयोजित एक कार्यक्रममा बोल्दै नेपालको संविधान पूर्ण रूपमा कार्यान्वयन गर्नुपर्ने र समावेशी लोकतन्त्रको रक्षा गर्नुपर्ने कुरामा जोड दिएका छन्।

गोरखाको पालुङ्टारमा भएको ३१औँ विश्व आदिवासी जनजाति दिवसको कार्यक्रममा बोल्दै नेकपा (माओवादी केन्द्र) का वरिष्ठ उपाध्यक्ष श्रेष्ठले समानुपातिक समावेशीकरणका उपलब्धिहरूलाई जोगाउन र थप विस्तार गर्न आग्रह गरे। उनले महिला, आदिवासी जनजाति, दलित, मधेसी, थारु, मुस्लिमलगायतका समुदायको प्रतिनिधित्व र आरक्षणलाई सबै तहमा सुनिश्चित गर्नुपर्ने बताए।

श्रेष्ठले हजारौँको बलिदानबाट प्राप्त लोकतान्त्रिक व्यवस्थामाथि प्रतिगमनको खतरा रहेको भन्दै यसलाई जोगाउन सबैले सचेत रहनुपर्ने बताए। उनले संविधानमा व्यवस्था गरिएको स्वायत्त, संरक्षित र विशेष क्षेत्रको अवधारणालाई व्यवहारमा लागू गरी सीमान्तकृत समुदायको पहिचान र अधिकारलाई सुनिश्चित गर्नुपर्ने आवश्यकता औँल्याए।

राजनीतिक अस्थिरताको अन्त्य गर्नका लागि शासकीय प्रणालीमा सुधार, प्रत्यक्ष निर्वाचित कार्यकारी प्रमुख, भ्रष्टाचार नियन्त्रण र सुशासन आवश्यक रहेको उनको भनाइ थियो। उनले बाँकी रहेका अधिकार प्राप्त गर्नका लागि आदिवासी जनजाति र सीमान्तकृत समुदायलाई एकताबद्ध भएर सङ्घर्ष गर्न पनि आह्वान गरे।