चीन र अमेरिकाले जलवायु संकटविरुद्धको लडाइमा सहकार्य गर्ने

ग्लास्गो । संसारका दुई ठूला कार्बन उत्सर्जक मुलुकहरु चीन र अमेरिकाले जलवायु संकटविरुद्ध सहकार्य गर्ने भएका छन् । मिथेन ग्याँस उत्सर्जनलाई घटाउने, वन संरक्षण गर्ने र इन्धनको खपतलाई रोक्ने विषयमा सहकार्य गर्ने उनीहरुको भनाइ छ ।

ग्लास्गोमा भैरहेको राष्ट्रसंघीय जलवायु सम्मेलन ९कोप(२६० अन्तर्गत संयुक्त वक्तव्य जारी गर्दै उनीहरुले ठोस योजनासहित जलवायु परिवर्तनविरुद्धको लडाइमा दोब्बर प्रयत्न गर्ने सहमति गरेको जनाएका छन् ।

यी दुई ठूला कार्बन उत्सर्जक मुलुकहरुले सन् २०२० को जलवायु योजना, सन् २०१५ को पेरिस सहमतिको कार्ययोजनामा टेकेर सन् २०२५ भित्र व्यापक मात्रामा कार्बन उत्सर्जनमा कटौती गर्ने उनीहरुको योजना छ ।

साथै उनीहरुले डिकार्बोनाइजेसन, मिथेन उत्सर्जनलाई घटाउने र वन फँडानीलाई रोक्नको लागि ठोस काम गर्नको लागि आह्वान गरेका छन् । ‘अहिलेको प्रयत्न र पेरिस सहमतिको लक्ष्यबीच भिन्नता देखिएकाले दुबै मुलुक मिलेर जलवायु परिवर्तनविरुद्ध लड्ने सहमती भएको हो’ चीनका जलवायु दूत जी जेनहुआले भने ।

राजदूत जीका अनुसार दुबै मुलुकहरुले यस दशकको अन्त्यसम्म ठोस कार्यक्रम बनाएर जलवायु योजनालाई अघि बढाउने तथा कोप-२६ सम्मेलनमा विगतको पेरिस सहमतीका बुँदालाई पनि पुनःसमीक्षा गर्ने सहमती भएको छ ।

सन् २०१५ मा पेरिस सम्मेलनमा कार्बन उत्सर्जनलाई घटाउँदै पृथ्वीको तापक्रम १।५ देखि २ डिग्रीसम्म सीमित गर्ने सहमती भएको थियो । यस्तो सहमती जुटाउन विगत १० महिनादेखि चीन र अमेरिकाले ३० वटा भर्चुअल बैठक आयोजना गरेका थिए ।