चितवनमा क्रिप्टोकरेन्सी कारोबार गरेको आरोपमा एक जना पक्राउ

चितवन । चितवनमा अवैध रूपमा भर्चुअल वा अभौतिक मुद्रा (क्रिप्टोकरेन्सी) को कारोबार गरेको आरोपमा प्रहरीले एक जनालाई पक्राउ गरेको छ।

जिल्ला प्रहरी कार्यालय चितवनका अनुसार पक्राउ पर्नेमा नवलपरासी (बर्दघाट सुस्ता पूर्व) कावासोती नगरपालिका वडा नं. ०१ स्थायी घर भई हाल चितवनको भरतपुर महानगरपालिका वडा नं. १० बस्ने २४ वर्षीय बुद्धिसागर भुषाल रहेका छन्।

विशेष सूचनाको आधारमा जिल्ला प्रहरी कार्यालय भरतपुर चितवनबाट खटिएको प्रहरी टोलीले जेठ १८ गते बेलुका अन्दाजी ७:४५ बजे (१९:४५ बजे) उनलाई फेला पारेको थियो। कानुन बमोजिम खानतलासी गर्दा भुषालले विद्युतीय उपकरण (मोवाईल) को प्रयोग गरी 'बाइनान्स' (Binance) एप्लिकेसन मार्फत क्रिप्टोकरेन्सीको अवैध कारोबार गरिरहेको फेला परेको प्रहरीले जनाएको छ।