विपक्षी दलको अवरोधपछि प्रतिनिधि सभा बैठक जेठ २५ सम्मका लागि स्थगित

काठमाडौँ । प्रधानमन्त्रीको सीमा सम्बन्धी अभिव्यक्तिलाई लिएर जारी विवादकाबीच प्रतिनिधि सभा बैठक कार्यसूचीमा प्रवेश गर्न नसकी स्थगित भएको छ। विपक्षी दलहरूले विरोध जारी राखेपछि सभामुखले अर्को बैठक जेठ २५ गतेका लागि तय गरेका छन्।

दिउँसो १ बजेका लागि निर्धारित बैठक करिब दुई घण्टा ढिलो गरी सुरु भएको थियो। बैठक प्रारम्भ भएपछि विपक्षी दलका सांसदहरूले उठेर विरोध जनाएका थिए।

सभामुख डोलप्रसाद अर्यालले प्रारम्भमा विपक्षी दलका केही सांसदलाई आफ्नो धारणा राख्ने अवसर दिएका थिए। सांसदहरूले आफ्ना भनाइ प्रस्तुत गरे पनि सदनको गतिरोध अन्त्य हुन सकेन।

विपक्षी दलहरूले प्रधानमन्त्री वालेन्द्र शाह (बालेन)ले नेपाल-भारत सीमा सम्बन्धी विषयमा संसद्मा दिएको अभिव्यक्तिको तथ्यगत आधार सार्वजनिक गर्नुपर्ने माग गर्दै आएका छन्। यदि उक्त अभिव्यक्ति प्रमाणविहीन भएको पुष्टि भए प्रधानमन्त्रीले संसद्मा माफी माग्नुपर्ने उनीहरूको अडान छ।

मंगलबारको बैठकमा पनि विपक्षी दलहरूले यही माग दोहोर्‍याएका थिए। त्यसपछि सभामुखले निर्धारित कार्यसूची अघि बढाउने प्रयास गरे पनि निरन्तर विरोधका कारण सदन सञ्चालन सम्भव हुन सकेन।

अन्ततः सभामुख अर्यालले प्रतिनिधि सभाको बैठक जेठ २५ गतेसम्मका लागि स्थगित भएको घोषणा गरेका हुन्।

मंगलबारको बैठकमा राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्रको जानकारी गराउने लगायतका कार्यसूची समावेश गरिएको थियो।