प्रधानमन्त्रीको अभिव्यक्तिविरुद्ध तरुण दलको प्रदर्शन

काठमाडौँ । सदनमा प्रधानमन्त्री वालेन्द्र शाह (बालेन)ले दिएको विवादास्पद भनाइप्रति असन्तुष्टि जनाउँदै नेपाली काँग्रेस निकट भ्रातृ संगठन नेपाल तरुण दलले पनि विरोध प्रदर्शन गरेको छ।

काठमाडौँको माइतीघर क्षेत्रमा आयोजित प्रदर्शनमा तरुण दलका नेता तथा कार्यकर्ताहरूले विभिन्न नारासहित प्लेकार्ड प्रदर्शन गरेका थिए। प्रदर्शनका क्रममा उनीहरूले प्रधानमन्त्रीको अभिव्यक्तिलाई लिएर राष्ट्रिय भावना र ऐतिहासिक योगदानप्रति अपमान भएको आरोप लगाएका थिए।

प्रदर्शनकारीहरूले बोकेका प्लेकार्डहरूमा राष्ट्रप्रेम केवल अभिव्यक्तिमा सीमित भएको जस्ता सन्देश समेटिएको थियो। उनीहरूले प्रधानमन्त्रीको भनाइले देशभक्ति र राष्ट्रिय सम्मानमाथि प्रश्न उठाएको दाबी गरेका छन्।

यसअघि पनि प्रमुख प्रतिपक्षी दल नेपाल कम्युनिष्ट पार्टी (एमाले) ले प्रधानमन्त्रीको अभिव्यक्तिप्रति आपत्ति जनाउँदै विरोध कार्यक्रम गरेको थियो।