ओली–प्रचण्ड भेटवार्ता : स्थायी समिति बैठकका सर्कुलर तयार, असोज १५ भित्र मन्त्रिमण्डल हेरफेर

काठमाडौं । पार्टी विवाद मैझारो गरेसँगै सत्तारुढ दल नेकपाका दुई अध्यक्ष प्रधानमन्त्री केपी ओली र पुष्पकमल दाहाल बीच भेटवार्ता भएको छ । 
प्रधानमन्त्री निवास बालुवाटारमा हिजो आइतबार साँझ बालुवाटारमा भएको भेटवार्तामा पार्टी एकता जोगाउन एक अर्का नेताले देखाएको लचकताको प्रसंसा गर्दै धन्यवाद आदान प्रदान पनि गरियो ।

बालुवाटार स्रोतका अनुसार, दुई अध्यक्षले त्यसपछि स्थायी समिति बैठकले पारित गरेको दई अध्यक्षको प्रस्ताव कार्यान्वयनका विषयमा छलफल केन्द्रीत गरेका थिए । नेकपाले १० असार देखि जारी स्थायी समिति बैठकलाई २६ भदौंमा समापन गरेका थिए । बैठक समापन गर्दा नेकपाले पार्टीभित्रको विवादको रोडम्याप फेला पारेको छ , ओलीले अब प्रतिनिधीसभाको बाँकी कार्यकालसम्मै सरकारको नेतृत्व गर्ने, प्रचण्डले पार्टी कामको जिम्मा लिने, बैठक सञ्चालन, निर्णयको कार्यान्वयन र समग्र पार्टी कामको जिम्मा प्रचण्डले लिने समझदारी दुई अध्यक्षका बीचमा भएको छ ।

सोही अनुसार कार्यविभाजन प्रस्ताव स्थायी समिति बैठकले पारित गरेको छ । सँगै सरकारलाई प्रभावकारी बनाउन केन्द्र देखि प्रदेश सम्मका सरकार आवश्यकताका आधारमा पूर्नगठन गर्ने लगायतका विषय पनि कार्यसूचिमा छन् । स्थायी समितिले त्यसको म्यान्डेट दिईसकेको छ । अब मन्त्रिमण्डल हेरफेर गर्ने कार्यसूचि स्थायी समिति बैठकले पारित गरेपछि त्यसमा छलफलमा प्रवेश गर्नुपर्ने छ । 

तर हिजोको छलफलमा दुई अध्यक्षले पार्टी बैठकको समिक्षा गर्दै पारित प्रस्ताव कार्यान्वयनका सन्र्दभमा छलफल गरेका थिए । छलफलमा ओली र दाहालले महासचिव विष्णु पौडेललाई पनि सँगै राखेका थिए । महासचिव पौडेलले दिएको जानकारी अनुसार, छलफलमा स्थायी समिति बैठकले पारित गरेको प्रस्ताव कार्यान्वयनमा केन्द्रीत रहेर छलफल भएको थियो ।

तल्ला कमिटिमा पार्टी स्थायी समिति बैठकले पारित गरेको प्रस्तावका बारेमा सर्कुलर गर्ने गरि उनीहरुले छलफल गरेर त्यसको तयारी गरेका थिए । हिजोको छलफलका आधारमा दुई अध्यक्षले आज (सोमबार) बेलुकीसम्म पार्टीका तल्ला कमिटिमा बैठकको निर्णय सर्कुलर गर्ने तयारी भएको छ । त्यसको खाका महासचिव पौडेललाई तयार पार्न अध्इक्षद्धयले निर्देशन गरिसकेका छन् । 

पार्टी बैठक निर्णयको सर्कुलर गरिसकेपछि पून सचिवालय बैठक वोलाउने र मन्त्रिमण्डल हेरफेरको विषयमा केन्द्रीत रहेर छलफल शुरु गर्ने तयारी दुई अध्यक्षको छ । एकपटक सचिवालय बैठक राखेर मन्त्रिमण्डल हेरफेरको मापदण्ड बनाउने र पछि दुई अध्यक्ष छलफल गरेर त्यसको अन्तिम तयारी गर्ने दुई अध्यक्षमा छलफल छ ।

सोही आधारमा नेकपाले अबको केही दिन भित्रै फेरि सचिवालय बैठक बोलाउने तयारी गरेको छ । असोज १५ भित्रै सरकार हेरफेरको काम सक्ने गरी ओली र दाहालका बीचमा छलफल शुरु भईसकेको स्रोतको भनाई छ ।