प्रधानमन्त्रीको सीमासम्बन्धी अभिव्यक्तिमा सभामुख मौन रहेको भन्दै नेकपाले जनायो असन्तुष्टि

काठमाडौँ । नेपाली कम्युनिस्ट पार्टी (नेकपा) का सांसद गोपाल शर्माले प्रधानमन्त्रीले संसदमा दिएको सीमासम्बन्धी अभिव्यक्तिका विषयमा सभामुखले आवश्यक निर्देशन जारी नगरेको भन्दै आपत्ति जनाएका छन्।

बुधबार बसेको प्रतिनिधि सभा बैठकमा बोल्दै सांसद शर्माले प्रधानमन्त्रीबाट आएको भनिएको गलत अभिव्यक्ति हालसम्म सच्याइएको नदेखिएको बताए। उक्त विषयमा सभामुख डोलप्रसाद अर्यालले पनि कुनै रुलिङ नगरेको भन्दै उनले असन्तुष्टि व्यक्त गरे।

सांसद शर्माले सम्बन्धित अभिव्यक्तिको जिम्मेवारी प्रधानमन्त्री स्वयंले लिनुपर्ने र संसदमा उपस्थित भएर त्यसलाई स्पष्ट वा सच्याउनुपर्ने धारणा राखे। त्यसो नभएसम्म आफ्नो दलको विरोध कायम रहने उनको भनाइ थियो।

उनले संसद्को गरिमा र मर्यादामाथि असर पुग्ने गतिविधि भइरहेको आरोप लगाउँदै सरकारको कार्यशैलीप्रति प्रश्न उठाए। सरकार संसद्प्रति पर्याप्त रूपमा जवाफदेही र उत्तरदायी हुन नसकेको गुनासो समेत उनले गरे।

प्रतिनिधिसभा बैठकमा उठाइएको उक्त विषयले सरकार र संसदबीचको उत्तरदायित्व तथा संसदीय प्रक्रियासम्बन्धी बहसलाई पुनः चर्चामा ल्याएको छ।