विपद् व्यवस्थापनमा उच्च मनोबलसहित खटिन सशस्त्र प्रहरीलाई निर्देशन

चितवन  । सशस्त्र प्रहरी बल नेपालका महानिरीक्षक राजु अर्यालले राष्ट्र र नागरिकप्रतिको सेवाभावलाई प्राथमिकतामा राख्दै सकारात्मक सोच र उच्च मनोबलका साथ कार्यक्षेत्रमा परिचालन हुन संगठनका सदस्यहरूलाई निर्देशन दिएका छन् ।

चितवनको कुरिनटारस्थित विपद् व्यवस्थापन तालिम शिक्षालयको २२औँ स्थापना दिवसका अवसरमा आयोजित कार्यक्रममा उनले विपद् प्रभावित नागरिकको उद्धारमा खटिँदा सुरक्षालाई पहिलो प्राथमिकतामा राख्नुपर्नेमा जोड दिए ।

उनले उक्त शिक्षालयले छोटो अवधिमै विपद् व्यवस्थापन क्षेत्रमा विशिष्ट पहिचान बनाउँदै आएको उल्लेख गर्दै संकटग्रस्त अवस्थामा नागरिक उद्धारमा महत्वपूर्ण योगदान पुर्‍याएको बताए । साथै, देशका विभिन्न दुर्गम तथा जोखिमयुक्त क्षेत्रहरूमा समेत तत्काल परिचालन भई मानवीय सेवामा सक्रिय भूमिका निर्वाह गर्दै आएको उनले स्पष्ट पारे ।