समानान्तर गतिविधिले कांग्रेस संकटमा : गगन पक्ष कारवाही मोडमा

काठमाडौ । प्रमुख प्रतिपक्षी दल नेपाली कांग्रेसको घर झगडा थप पेचिलो बन्न थालेको छ । कांग्रेस नेता समेत रहेका पूर्व गृहमन्त्री रमेश लेखक पक्राउपछि सस्थापन र देउवा कोइराला समुहका बीचमा फरक धारणासहितको बक्तब्यबाजी भएपछि फेरि घर झगडा सतहमा आएको हो ।

यो विवादपछि कांग्रेसमा समानान्तर गतिविधि तीव्र हुन थालेको छ । विशेष महाधिवेशन गरी गगन थापा सभापति बनेपछि निर्वाचन आयोगले समेत गगन थापा नेतृत्वको समितिलाई बैधानिकता दिएको छ । त्यही वैधानिकतापछि कांग्रेस गगन थापाको हस्ताक्षरसहि तगत फागुन २१ को प्रतिनिधिसभा चुनावमा भाग लिन पुगेको थियो । 

पूर्व सभापति शेरवहादुर देउवा, शेखर कोइराला समुह लगायतका ३२ जना नेताले गगन थापाको हस्ताक्षर भएको टिकट नै लिएर चुनाव लड्न पुगेका थिए । यसरी चुनाव लड्नेमा शेखर कोइराला स्वयम पनि थिए । देउवाका विश्वासिला पात्र डा प्रकाशशरण महत, विमलेन्द्र निधि लगायतका नेताहरु पनि गगन थापाले नै हस्ताक्षर गरेको टिकट लिएर चुनाव लडेका थिए । 

निर्वतमान सभापति शेरवहादुर देउवा र उनकी पत्नी अरजु राणा देउवा भने निर्वाचनमा मतदान नै नगरी सिंगापुर पुगेका थिए । सिंगापुर पुगेका देउवा दम्पती अहिले हङकङ छन् । 

कांग्रेसको सभापति गगन थापा पक्षले भने विदेश बसेरै देउवाले अहिले गुट चलाउन थालेको आरोप लगाउँदै अब समानान्तर गतिविधि गर्ने नेतामाथी कारवाही प्रक्रिया अगाडी बढाउने निश्कर्ष निकालेको छ ।

गगनहरुले समानान्तर गतिविधि गर्नेमाथी कारवाही प्रक्रिया अगाडी बढाउने र देउवा कोइराला समुहले समानान्तर गतिविधि गर्न नछोडने निति लिएपछि कांग्रेस अब भने जटिल विभाजनको मोडमा पुगेको छ । कांग्रेसको आधिकारिकता विवाद सर्वाेच्च अदालतमा विचाराधिन छ । चैत २२ मा सर्वाेच्चमा त्यसउपर पेशी तोकिएको छ । 

रमेश लेखक पक्राउपछि कार्यवाहक सभापतिको हैसियतमा पूर्णबहादुर खड्काले वक्तब्य दिएका थिए । ठमेलको एक होटलमा देउवा कोइराला समुहको बैठक बसेर लेखक पक्राउमा राजनीतिक पूर्वाग्रह राखिएको र त्यसको शसक्त प्रतिवाद गर्ने निर्णयसहितको वक्तब्य दिएका थिए । 

पार्टीको लेटरहेडमा कार्यावबाहक सभापतिको हैसियतमा खड्काले वक्तब्य जारी गरेपछि कांग्रेस झस्किएको छ । त्यत्तिमात्रै होइन, खड्काले देउवा कोइराला पक्षका नवनिर्वाचित प्रतिनिधिसभा र राष्टिय सभाका सांसदहरुलाई सोमबार मात्रै काठमाडौंकै अर्काे एक होटेलमा कार्यक्रम आयोजना गरी सम्मान गरेको थियो । उक्त कार्यक्रममा कांग्रेसका प्रतिनिधिसभाका ११ र राष्टिय सभाका ४ गरी १५ सांसद सहभागी भएका थिए । 

कांग्रेससङ्ग प्रतिनिधिसभामा ३८ र राष्टिय सभामा पछिल्लो पटक ९ सांसद निर्वाचित भएका थिए । यसमध्येका १५ सांसद देउवा कोइराला समुहले बोलाएको सम्मान कार्यक्रममा सहभागी भएका थिए । 

यसलाई पनि गगन थापा पक्षले गम्भिरतापूर्वक लिएको छ । गगन पक्षले अनुशासनमा नबस्ने र पार्टी निर्णयमा भूमिका खेल्न नसक्ने सांसदलाई फिर्ता बोलाउन सक्ने चेतावनी दिएको भोलिपल्टै देउवा कोइराला समुहको सम्मान कार्यक्रममा कांग्रेसका दुवै सदनका गरी १५ सांसद पुगेका थिए । 

कार्यबाहक सभापतिका हैसियतले पूर्णबहादुर खड्काले कांग्रेसको १४ औं महाधिवेशनबाट निर्वाचित केन्द्रीय कार्यासमितिको बैठक समेत आज र भोलिका लागि बोलाएका छन् । त्यसका लागि उनले काठमाडौं आउन केन्द्रीय कार्यासमितिका सदस्यहरु सबैलाई निम्ता पठाएका थिए । 

त्यसलगत्तै पर्सि अर्थात चैत १९ गते जिल्ला सभापतिहरुको भेला समेत खड्काले बोलाउने तयारी गरेका छन् । मिति घोषणा नगरेपनि त्यसदिनको तयारीमा बस्न र काठमाडौं केन्द्रीत भईराख्न उनले सूचना पठाईसकेको खड्का निकट स्रोतले बताएको छ । 

पार्टीको नाम, लेटरहेड प्रयोग गरेर इतर पक्षले समानान्तर गतिविधि थालेपछि गगन पक्ष भने अब कारवाहीको निश्कर्षमा पुगेको छ । गगनले सोमबार नै पार्टी पदाधिकारी बैठक बोलाएका थिए । त्यहाँ उनले अब समानान्तर गतिविधि जारी राखे सहेर नबस्ने निश्कर्ष सुनाएका थिए । निर्वतमान सभापतिले विदेशमा बसेरै गुट चलाईरहेको र त्यहाँबाट निर्देशन लिएरै कार्याबाहक सभापतिका नाममा पूर्णवहादुर खड्काले बैठकहरु बोलाउन थालेको गगन पक्षको आरोप छ । 

समानान्तर गतिविधि गर्नेलाई आज उनीहरुको बैठक हेरेर भोलि अनुशासन समितिको बैठक राखेर कारवाही प्रक्रिया अगाडी बढाउने योजना गगन पक्षले लिएको छ । त्यसका लागि केन्द्रीय अनुशासन समितिको बैठक भोलिका लागि डाँकिएको छ ।

यसले कांग्रेसभित्रको विवाद थप चुलिएको छ । यसले अब पार्टी एकतामा भन्दा विभाजनतिरै उन्मुख हुन थालेको नेताहरुले नै बताउन थालेका छन् ।