यस्तो छ नयाँ सरकार बनाउने संवैधानिक प्रावधान

काठमाडौं । प्रधानमन्त्री केपी शर्मा ओलीले आज लिने भनिएको विश्वासको मतका लागि प्रतिनिधिसभामा रहेका सांसदहरुको बहुमत पुग्न नसकेमा कुन–कुन पार्टी मिलेर नयाँ सरकार बनाउँछन् भन्नेमा अन्योल नै रहेको छ ।

नेकपा माओवादी केन्द्र र नेपाली कांग्रेसले विश्वासको मतको विपक्षमा भोट दिने, जनता समाजवादी पार्टी तटस्थ बस्ने र सांसद माधव नेपाल समूहले पनि विश्वासको मतको पक्षमा भोट नहाल्ने देखिएपछि प्रधानमन्त्री ओली अल्पमतमा पर्ने निश्चित जस्तै छ ।

नेपाल पक्ष र प्रधानमन्त्री ओली पक्षबीच छलफल गर्ने क्रम बढेसँगै विश्वासको मतका लागि भोट दिने बेलासम्म उनीहरू सहमतिमा आउन पनि सक्ने कतिपयको आँकलन छ । उनीहरूबीच सहमति भइहालेमा पनि माओवादी केन्द्रले सरकारलाई दिएको समर्थन फिर्ता लिइसकेको अवस्थामा प्रतिनिधिसभामा बहुमत पु¥याउन ओली सरकारले अन्य दलको सहारा लिनैपर्ने हुन्छ । बहुमत पु¥याउन १ सय ३६ सांसद चाहिन्छ ।

हाल प्रतिनिधिसभामा नेपाल कम्युनिस्ट पार्टी एमालेको १ सय २१, नेपाली कांग्रेसको ६३, माओवादीको ४९, जनता समाजवादी पार्टी (जसपा) को ३२ र अन्य दलको तीन सदस्य रहेका छन् ।ओलीको सरकार नेपालको संविधानको धारा ७६ को उपधारा (१) बमोजिम गठन भएको हो । विश्वासको मतमा प्रधानमन्त्री असफल भएमा सोही धाराको उपधारा (२) बमोजिम सरकार गठन गर्नुपर्ने हुन्छ ।

प्रतिनिधिसभामा कुनै पनि पार्टीको स्पष्ट बहुमत नभएका कारण उपधारा (२) बमोजिम सरकार गठन गर्न दुई वा दुईभन्दा बढी पार्टीको गठबन्धन हुनैपर्ने हुन्छ । नेपाल समाचारपत्र दैनिकमा खबर छ ।