अहिले हटाउन्, २० महिनापछि दुई तिहाइ ल्याएर सिंहदरबार छिर्छु : ओली

काठमाडौँ । नेकपा एमालेका अध्यक्ष तथा प्रधानमन्त्री केपी शर्मा ओलीले आफूले अहिले प्रधानमन्त्रीबाट हटाए पनि २० महिनापछि दुई तिहाइ ल्याएर सिंहदरबार छिर्ने बताएका छन् । अखिल नेपाल महिला संघ केन्द्रीय कमिटीले अन्तर्राष्ट्रिय श्रमिक महिला दिवसको सन्दर्भमा आयोजना गरेको भेलामा ओलीले अहिले आफू नेतृत्वको सरकार नरहे पनि आगामी चुनावबाट दुई तिहाइ ल्याउने बताए । 

आफ्नै पार्टीका नेता माधव कुमार नेपाल सहित माओवादी केन्द्रका अध्यक्ष प्रचण्डलगायतका विपक्षीहरुले बुनेका तानावानाले आफूलाई कुनै फरक नपर्ने ओलीको भनाइ थियो । व्यग्य गर्दै ओलीले भने, ‘माकुराले थापेको जालोमा भैसी पर्दैन । अहिले पनि माकुराहरूले थुुप्रै जालो थापे । तर गैँडा सुरु–सुरु अघि बढ्छ । जालो कहाँ थियो, त्यसले थाहै पाउँदैन ।’ 

ओलीले भने, ‘०७३ सालमा मलाई प्रधानमन्त्रीबाट हटाइयो, १९ महिनापछि दुुई तिहाई लिएर फर्किएँ । अहिले हटाउन सक्छन् हटाऊन । २० महिनापछि फेरि यो पार्टी, सूूर्य चिन्हधारी पार्टी, नेकपा एमाले नामको पार्टी, दुुई– तिहाई लिएर सिंहदरबारको मुलगेटबाट फेरि पस्छौँ ।’ 

प्रधानमन्त्री ओलीले चैत ७ गते केन्द्रीय समितिको बैठक बोलाएको बताए । उनले भने, ‘प्रशस्त समय होस् भनेर चैत ७ गते बैठक बोलाएको छु। यत्रो विघ्न टेलिभिजनमा खिच्या छ। लाईभ दिइराख्या होला। सुनिनँ भन्न पाइने छैन। चैत ७ गते केन्द्रीय कमिटीको बैठक बालुबाटारमा बोलाएको छु। केन्द्रीय कमिटीका सदस्यहरु आउनुहोला। अनुपस्थित हुँदै जानुभो भने विधानको व्यवस्थाअनुसार हुँदै जानेछ।’