आवश्यकतामा आधारित कानुन निर्माण संसद्को प्राथमिकता : सभामुख अर्याल

काठमाडौँ । सभामुख डोलप्रसाद अर्यालले मुलुक र नागरिकको आवश्यकता अनुरूप कानुन निर्माण गर्नु संसद्को प्रमुख दायित्व रहेको बताएका छन्।

काठमाडौँको चन्द्रागिरि नगरपालिका-१३ स्थित कंकाली माध्यमिक विद्यालयको ४३औँ वार्षिकोत्सव कार्यक्रममा बोल्दै सभामुख अर्यालले संसद्ले समयसापेक्ष र जनअपेक्षा सम्बोधन गर्ने कानुन निर्माणमा जोड दिइरहेको बताए। कानुन निर्माण प्रक्रियामा आफ्नो भूमिकाको उल्लेख गर्दै उनले राष्ट्रिय आवश्यकता र जनहितलाई केन्द्रमा राखेर विधेयकहरू अघि बढाइने धारणा राखे।

कार्यक्रममा उनले चार दशकअघि चार जना विद्यार्थीबाट सुरु भएको विद्यालयले पूर्वाधार र शैक्षिक क्षेत्रमा हासिल गरेको प्रगतिप्रति प्रशंसा व्यक्त गर्दै आगामी दिनमा थप उन्नतिको शुभकामना दिए।

त्यसै अवसरमा भूमिका श्रेष्ठले विद्यालयको विकासमा आफ्नो तर्फबाट आवश्यक सहयोग निरन्तर रहने प्रतिबद्धता जनाइन्।

विद्यालयका प्रधानाध्यापक विष्णु पनेरुले संस्थाले विगत चार दशकमा हासिल गरेका उपलब्धिको समीक्षा गर्दै गुणस्तरीय शिक्षालाई थप सुदृढ बनाउन आगामी दिनमा प्रयास जारी रहने बताए।