प्रधानमन्त्री ओलीले माधव नेपाललाई किन भने पार्टी फुटको डिलमा पुग्यो भनेर ?

सफल खबर संवाददाता

आइतबार, २३ कार्तिक २०७७, १७ : ३२
प्रधानमन्त्री ओलीले माधव नेपाललाई किन भने पार्टी फुटको डिलमा पुग्यो भनेर ?

काठमाडौं । नेकपाका अध्यक्ष तथा प्रधानमन्त्री केपी शर्मा ओलीले वरिष्ठ नेता माधव नेपालसहित उनी पक्षका केही नेतालाई बोलाएर पार्टी फुटको डिलमा पुगेको बताएका छन् । 

सचिवालयका पाँचजना नेताले दुईदिनभित्रमा सचिवालय बैठक बोलाउन अल्टिमेटम दिएको भोलिपल्टै ओलीले नेता नेपालसहित उनी पक्षका नेतालाई बोलाएर पार्टी फुटको संघारमा पुग्न लागेको बताए । प्रधानमन्त्री ओलीले माधव नेपालसँग पार्टी बचाउन पटकपटक आग्रह गरेका थिए । प्रधानमन्त्री ओलीको निम्तो आएपछि वरिष्ठ नेता नेपालसहित भीम रावल, सुरेन्द्र पाण्डे र रघुजी पन्त बालुवाटार पुगेका थिए । 

‘बालुवाटारमा भएको छलफलमा खास निष्कर्ष केही निस्केन, प्रधानमन्त्रीले पार्टी फुटको डिलमा पुगेको छ । सबै मिलेर बचाऔं भन्नुभयो’ नेता पन्तले प्रधानमन्त्रीको भनाई उद्धृत गर्दै भने । 

‘हामीले पार्टी अध्यक्ष र प्रधानमन्त्रीको हैसियतमा निर्णायक भूमिका भएकाले सहमतिको पहल थाल्न आग्रह गरेका छौँ’ नेता पन्तले भने, ‘ सिंगो पार्टीलाई एकताबद्ध हुने गरी काम गर्नुस् । समस्याको समाधान पार्टीको बैठकबाट हुन्छ । तपाईँ लचिलो हुनुपर्छ, भनेर भन्यौँ ।’

बालुवाटारमा अढाइ घण्टाभन्दा बढी भएको छलफलमा पार्टी विवादबारे कुराकानी भएको थियो । प्रधानमन्त्रीले लामै कुरा गरेपनि ठोस प्रस्ताव भने नआएको सहभागी नेताहरुले भने । 
 

प्रतिक्रिया दिनुहोस