नेकपा स्थायी कमिटी बैठकमा आक्रमक रुपमा प्रस्तुत भए माधव नेपाल

काठमाडौं । नेपाल कम्युनिस्ट पार्टी (नेकपा)को बालुवाटारमा जारी स्थायी समिति बैठकमा वरिष्ठ नेता माधव कुमार नेपाल आक्रामक रुपमा प्रस्तुत भएका छन् । 

बैठकमा नेता नेपालले पार्टी विधि र पद्धतिमा चल्नु पर्नेमा जोड दिँदै अध्यक्षद्वय केपी शर्मा ओली र प्रचण्डले ल्याएको १५ बुँदे प्रस्तावप्रति चर्काे असन्तुष्टि जनाएको एक स्थायी समिति सदस्यले जानकारी दिए । 

नेपालले मुलतः अध्यक्षद्वयको प्रस्तावमा एक व्यक्ति एक पदको व्यवस्था नभएको प्रति चर्को असन्तष्टि जनाएका थिए । एक व्यक्ति एक जिम्मेवारीलगायतका विषय प्रस्तावमा किन समेटिएन ? विधि बिना पार्टी कसरी चल्छ ?’ भन्दै नेपाल बैठकमा कड्किए। 

उनले पार्टी एकताको ५ महिनायता निरन्तर एक व्यक्ति एक मुख्य जिम्मेवारीलगायतको मुद्दा उठाउँदै आएका छन् । उनको मुद्दामा पार्टीले कुनै पनि सुनुवाई गरेको छैन ।