दिल्लीको लाजपत नगरमा छ हावा शुद्ध गर्ने स्मोग टावर

दिल्ली । भारतको राजधानी दिल्लीको लाजपत नगरमा स्मोग टावर लगाइएको छ । २० फिट उचाईको यो स्मोग टावरले ७२० मिटर वरपर क्षेत्रको हावा शुद्ध गर्नेछ । 

स्मोग फ्रि टावरले दैनिक अढाई लाखदेखि ६ लाख क्यूबिक मिटर हावा सफा गर्नेछ । यसलाइ संचालन गर्न हरेक महिना तीस हजार भारु खर्च हुने संचालकहरुले बताएका छन् । 

स्मोग टावर संचालनमा लाग्ने खर्च मार्केट एसोसिएशनले तिर्नेछ । प्रदुषित दिल्लीको अवस्थामा सुधार ल्याउनको लागि पचास हजारभन्दा बढी टावरको आवश्यता छ । 

फ्रान्समा बनेको ‘शुद्ध’ नाम दिइएको एयर प्युरिफाइरलाई टे«ड्र्स एसोसिएशन लाजपत नगर र गौतम गम्भिर फाण्डेशनले लगाएको हो । 

एसोशियनका महासचिव अश्विनी मारवाहका अनुसार टावरले २ घण्टाभित्र हावा सफा गरेर एक्युआई ५० भन्दा माथि जान दिदैन । 

बिहिबार दिल्लीमा वर्षाको कमी र हावाको गति मन्द हुदाँ दिल्ली–एनसीआरको हावा गुणस्तर अत्यन्त गोखिमपूर्ण वर्गिकरणमा रहेको देखिएको थियो । 

बिहिबारकै मापनमा देशका ९९ सहरमध्ये ७ स्थानको हावा गुणस्तर अत्यन्त जोखिमपूर्ण वर्गिकरणमा रह्यो । यसमा दिल्ली–एनसीआर क्षेत्रकै तीन सहर थिए ।

भारतको हावाको मापनमा बिहिबार सबैभन्दा खराब हावा बिहार राज्यको मुजफ्फरपुरमा देखियो । यहाँ एक्युआई ४५० मापन गरिएको थियो ।