पूर्वमहानिर्देशक गौतमलाई भ्रष्टाचार मुद्दामा पुर्पक्षका लागि थुनामा पठाउने आदेश

काठमाडौँ । नेपाल नागरिक उड्डयन प्राधिकरणका पूर्वमहानिर्देशक सञ्जीव गौतमलाई विशेष अदालतले पुर्पक्षका लागि कारागार पठाउने आदेश दिएको छ ।

विशेष अदालतका न्यायाधीशहरू नारायणप्रसाद पौडेल, हेमन्त रावल र डिल्लीरत्न श्रेष्ठ सम्मिलित इजलासले मंगलबार गौतमलाई मुद्दाको टुंगो नलागेसम्म थुनामा राख्ने निर्णय गरेको हो ।

पोखरा विमानस्थल निर्माणसँग सम्बन्धित अनियमितताको आरोपमा अख्तियार दुरुपयोग अनुसन्धान आयोगले गौतमसहित तत्कालीन निर्देशक प्रदीप अधिकारीलगायतविरुद्ध मुद्दा दायर गरेको थियो ।

अख्तियारले गौतममाथि आर्थिक अनियमिततामा संलग्न भएको दाबी गर्दै ६ करोड ७३ लाख ९९ हजार ६४८ रुपैयाँ ५९ पैसा बिगो असुल गरी कानुनबमोजिम कारबाही गर्न माग गरेको थियो ।

अदालतको आदेशअनुसार अब गौतम न्यायिक प्रक्रियाअन्तर्गत कारागारमा रहनेछन् । यस प्रकरणमा आरोपित अर्का व्यक्ति अधिकारी यसअघि नै थुनामा पठाइसकिएका छन् ।