कम्युनिस्ट पार्टीहरुबीच एकता गर्नुपर्छ : घनश्याम भुसाल

काठमाडौँ । नेकपा एमालेका नेता घनश्याम भुसालले नेपालमा कम्युनिस्ट पार्टीहरुबीच एकता गरेर जानुपर्ने प्रस्ताव पार्टीको पोलिटब्यूरो बैठकमा राखेका छन् ।

आज बबरमहलमा सुरु भएको बैठकमा नेता भुसालले एमाले वाम एकताको मूल प्रवाह भएको बताउँदै कम्युनिस्ट पार्टीहरुबीच विभाजन हुनुमा कुनै वैचारिक तथा सैद्धान्तिक कारण नभएकोले एकता गरेर नै जानुपर्ने प्रस्ताव राखेका हुन् ।

बैठकमा भुसालले विगतमा माओवादी केन्द्र र एमाले मिलेर बनेको नेकपा विभाजन हुनुमा वैचारिक तथा सैद्धान्तिक कारण नरहेको र आगामी निर्वाचनमा पनि वामपन्थीहरुको जित सुनिश्चित गर्न कम्युनिस्ट पार्टीहरुबीच एकता गठबन्धन बनाउनुपर्ने बताए । स्रोतका अनुसार अहिले पनि कम्युनिस्ट पार्टीहरुका बहुसंख्यक सदस्य र कार्यकर्ता एकताकै पक्षमा रहेको भुसालको तर्क थियो ।