घानालाई हराउँदै क्रोएसिया विश्वकपको नकआउट चरणमा, स्कटल्यान्ड बाहिरियो

काठमाडौँ । निकोला भ्लासिचले खेलको उत्तरार्धमा गरेको उत्कृष्ट गोलको मद्दतले घानालाई २–१ ले पराजित गर्दै क्रोएसिया फिफा विश्वकप २०२६ को नकआउट चरण (अन्तिम ३२) मा प्रवेश गरेको छ ।

शनिबार फिलाडेल्फियामा भएको समूह ‘एल’ को निर्णायक खेलमा ज्लाट्को डालिचको टोली क्रोएसियालाई अर्को चरणमा पुग्न हारबाट जोगिनु पर्ने समीकरण थियो । खेल सकिन सात मिनेट बाँकी छँदा भ्लासिचले हेडिङमार्फत गोल गरेपछि क्रोएसिया समूहको उपविजेता बन्दै नकआउट चरणमा पुग्न सफल भयो । यसै समूहको अर्को खेलमा पनामालाई हराएको इंग्ल्यान्ड समूह विजेता बन्यो ।

यसअघि नै अर्को चरणमा स्थान सुरक्षित गरिसकेको घाना विरुद्ध खेलको ३१ औं मिनेटमा पेटार सुचिचले उत्कृष्ट गोल गर्दै क्रोएसियालाई सुरुवाती अग्रता दिलाएका थिए । माटिओ कोभाचिचको पासलाई नियन्त्रणमा लिँदै इन्टर मिलानका मिडफिल्डर सुचिचले बललाई पोस्टको तल्लो कुनामा भित्र्याएका थिए ।

पहिलो हाफमा दबाबमा परेको घाना दोस्रो हाफमा भने आक्रामक रूपमा प्रस्तुत भयो । खेलको ७३ औं मिनेटमा अर्नेस्ट नुआमाको पासमा डिफेन्डर डेरिक लुकासेनले हेडिङमार्फत गोल गर्दै घानालाई १–१ को बराबरीमा ल्याए । सो गोललाई भिडियो असिस्टेन्ट रेफ्रीले झण्डै चार मिनेटको ‘अफसाइड’ जाँचपछि मात्र मान्यता दिएको थियो ।

बराबरीपछि घानाले खेलमा पकड बनाउन खोजे पनि ८३ औं मिनेटमा क्रोएसियाका कप्तान लुका मोड्रिचको उत्कृष्ट क्रसमा निकोला भ्लासिचले हेडिङमार्फत गोल गर्दै टोलीको जित पक्का गरे । यो हारका बाबजुद घाना तेस्रो स्थानमा रहने उत्कृष्ट टोलीहरूमध्ये एक बन्दै अन्तिम ३२ मा पुग्न सफल भएको छ । क्रोएसियाको यो जितसँगै समूह चरणबाटै स्कटल्यान्ड बाहिरिएको छ ।