पूर्वमहानिर्देशक अर्यालसहित ५ जनासँग धरौटी माग, २ जना साधारण तारेखमा

काठमाडौँ । विशेष अदालतले विद्युतीय राहदानी (ई-पासपोर्ट) खरिद प्रक्रियामा भएको भ्रष्टाचार मुद्दामा राहदानी विभागका तत्कालीन महानिर्देशक तीर्थराज अर्यालसहित पाँचजना प्रतिवादीसँग धरौटी माग गर्ने आदेश दिएको छ ।

विशेष अदालतका सदस्यहरू नारायणप्रसाद पौडेल, हेमन्त रावल र उमेश कोइरालाको इजलासले आइतबार यस्तो आदेश दिएको हो ।

अदालतले मुद्दाका अन्य दुई प्रतिवादीलाई भने साधारण तारिखमा राखेर मुद्दाको पुर्पक्ष गर्न भनेको छ ।

अदालतले प्रतिवादीहरूको पदीय हैसियत र संलग्नतालाई विचार गर्दै देहाय बमोजिमको धरौटी रकम माग गरेको छ:

१. तीर्थराज अर्याल (तत्कालीन महानिर्देशक): ५ लाख रुपैयाँ

२. मणिन्द्र राज मल्ल (सहजकर्ता): ५ लाख रुपैयाँ

३. सुनिल कुमार के.सी. (तत्कालीन निर्देशक): ४ लाख रुपैयाँ

४. सोमेश थापा (तत्कालीन शाखा अधिकृत): ३ लाख रुपैयाँ

५. विपिन प्रसाईँ (तत्कालीन कम्प्युटर इन्जिनियर): ३ लाख रुपैयाँ

अदालतले तोकिएको धरौटी रकम बुझाएमा उनीहरूलाई तारिखमा छोड्न र नबुझाएमा नियमानुसार थुनामा राख्न कारागार पठाउन आदेश दिएको छ ।