निर्वाचन आयोगले एमाले र माओवादी केन्दलाई भन्यो– एकीकरण गर्ने भए १५ दिनभित्र निवेदन ल्याउनू

काठमाडौं । नेकपा एमाले र नेकपा माओवादी केन्द्रबीच पार्टी एकीकरणको सम्भावना अझै टरेको छैन । निर्वाचन आयोगले नेकपा एमाले र नेकपा माओवादी केन्द्रलाई एकीकरण गर्ने भए १५ दिनभित्रमा निवेदन दिन आग्रह गरेको छ । आयोगले पार्टी एकीकरण गर्न नयाँ नामा र चिह्न चाहिने बताएको छ । 

आयोगले भनेको छ, ‘सम्मानित सर्वोच्च अदालतको मिति २०७७–११–२३ को फैसलाले बदर भएकोले अब यी दुई दलले दल एकीकरण गर्ने भए राजनीतिक दल सम्बन्धी ऐन, २०७३ र राजनीतिक दल सम्बन्धी नियमावली, २०७४ विपरित नहुने गरी दुबै दलले आफ्नो केन्द्रीय समितिबाट दल एकीकरण गर्ने गरी सो निर्णयसहित नयाँ दलको रुपमा एकीकरण गर्ने भएमा एकीकरणपछि बन्ने दलको नयाँ नाम र चिह्नसमेत प्रस्ताव गरी १५ (पन्ध्र) दिनभित्र आयोगमा निवेदनसहित उपस्थित हुनका लागि नेपाल कम्युनिष्ट पार्टी (एकिकृत–माक्सवादी–लेनिनवादी) र नेपाल कम्युनिष्ट पार्टी (माओवादी केन्द्र)लाई जानकारी गराउने।’

यसअघि नेकपा एमाले र नेकपा माओवादी केन्द्रबीच एकता भई बनेको नयाँ पार्टीलाई निर्वाचन आयोगले २०७५ जेठ २३ गते नेपाल कम्युनिस्ट पार्टी नेकपा नाममा दर्ता गरेको थियो । तर सर्वोच्च अदालतले नेकपाको नाम निर्वाचन आयोगमा पहिले नै दर्ता भएको पार्टीसँग मिल्दोजुल्दो भएको भन्दै खारेज गरेको थियो ।

आयोगले केपी शर्मा ओली र पुष्पकमल दाहाल प्रचण्ड अध्यक्ष रहेको नेकपा सर्वोच्चको फैसला बमोजिम खारेज गरिदिएको छ । यससँगै नेकपा नामको दल अब निर्वाचन आयोगमा एउटा मात्र रहने छ । सर्वोच्च अदालतले ऋषि कट्टेल नेतृत्वको नेकपालाई आधिकारिकता दिँदै आइतवार एमाले र माओवादी ब्युँताइदिएको थियो ।