निर्वाचन आयोगद्वारा प्रतिनिधि सभा निर्वाचन-२०८२ को खर्च विवरण सार्वजनिक

काठमाडौँ । निर्वाचन आयोगले प्रतिनिधि सभा सदस्य निर्वाचन-२०८२ को समग्र आर्थिक विवरण सार्वजनिक गरेको छ । आयोगले निर्वाचन सञ्चालनमा भएको बजेट निकासा, खर्च, राजस्व तथा धरौटीसमेत समेटिएको एकीकृत विवरण सार्वजनिक गरेको हो ।

संविधान र सम्बन्धित कार्यविधि तथा शासकीय सुधार कार्ययोजना अनुसार तयार गरिएको उक्त विवरण आयोगको वेबसाइटमार्फत सार्वजनिक गरिएको हो । आयोगको मिति २०८३ जेठ ५ गते बसेको बैठकको निर्णय अनुसार खर्च विवरण सार्वजनिक गरिएको जनाइएको छ ।

आयोगका अनुसार निर्वाचनका लागि नेपाल सरकारबाट ६ अर्ब ७१ करोड ९२ लाख ८७ हजार २ सय रुपैयाँ प्राप्त भएकोमा कुल खर्च ४ अर्ब ९६ करोड ७८ लाख ३९ हजार ४५ रुपैयाँ रहेको छ । सो आधारमा प्रति मतदाता सरदर खर्च करिब २६३ रुपैयाँ परेको आयोगले जनाएको छ ।

कुल १ करोड ८९ लाख ३ हजार ६ सय ८९ मतदाताको सहभागितामा निर्वाचन सम्पन्न भएको आयोगको विवरणमा उल्लेख छ ।

निर्वाचनलाई स्वच्छ, निष्पक्ष, मितव्ययी र विश्वसनीय बनाउन योगदान दिने सबै निर्वाचन अधिकृत, प्रमुख जिल्ला अधिकारी, सुरक्षाकर्मी तथा सम्बन्धित कर्मचारीप्रति आयोगले आभार व्यक्त गरेको छ ।