नेकपा विभाजनका लागि कसरत सुरु

काठमाडौं । प्रधानमन्त्री केपी शर्मा ओलीले संसद् विघटन गरेपछि नेकपाभित्रका शीर्ष नेताहरूले पार्टी विभाजनका लागि कसरत सुरु गरेका छन्। प्रधानमन्त्री ओलीसहित सचिवालय सदस्यहरू उपप्रधानमन्त्री ईश्वर पोखरेल, रामबहादुर थापा, महासचिव विष्णु पौडेल तथा स्थायी कमिटी सदस्य सुवास नेम्वाङ पार्टी विभाजनका लागि आवश्यक परामर्शमा जुटेका छन्। 

बहुमत केन्द्रीय सदस्यहरू कार्यकारी अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल समूहसँग भएपछि उनीहरूले आफ्नो पक्षको वैधानिकताका लागि परामर्श थालेका हुन्। दाहाल–नेपाल समूहसँग वरिष्ठ नेता झलनाथ खनाल, उपाध्यक्ष वामदेव गौतम तथा प्रवक्ता नारायणकाजी श्रेष्ठसहित बहुमत सचिवालय सदस्य, बहुमत स्थायी कमिटी सदस्य तथा बहुमत केन्द्रीय सदस्य छन्।

त्यसकारण पनि ओली पक्षलाई उनीहरूले अनुशासनको कारबाही गरेर हटाउन सक्ने र त्यसअगावै आफ्नो पक्षका केन्द्रीय सदस्य र सांसदहरूसँग परामर्श गरी पार्टीको आधिकारिकता सुरक्षित गर्न लागिपरेको बालुवाटारनिकट स्रोतले जनाएको छ।  दुवै पक्ष केन्द्रीय सदस्य संख्या आफ्नो पक्षमा बढी पार्ने कसरत गरिरहेका छन् ।

अहिले हेर्दा बहुमत केन्द्रीय सदस्यहरू दाहाल–नेपाल पक्षमा भए पनि उनीहरूको चाहना पार्टी विभाजन नहोस् भन्ने छ।  यद्यपि प्रधानमन्त्री ओलीले संसद् विघटन गरेपछि भने उनीहरूले आ–आफ्ना नेताहरूलाई सहयोग गर्नुको विकल्प नभएको बताउन थालेका छन्।नागरिक दैनिकमा खबर छ ।