प्रचण्डको निजी सचिवालयले भन्यो : ‘नेकपा अध्यक्ष प्रचण्ड र (रअ) प्रमुख गोयलबीच कुनै भेटघाट भएको छैन’, कपोलकल्पित र भ्रामक समाचारप्रति खेद

काठमाडौं । नेपाल कम्युनिष्ट पार्टी (नेकपा) का अध्यक्ष प्रचण्ड र  भारतीय गुप्तचर संस्था रिसर्च एण्ड एनालाइसिस विङ (रअ) का प्रमुख सामन्तकुमार गोयल बिच कुनै भेटघाट नभएको प्रचण्डको निजी सचिवालयले स्पष्ट पारेको छ । 

प्रचण्डका प्रेस संयोजक विष्णु सापकोटा जुगलले आज बिहिबार एक विज्ञप्ती जारी गर्दै  भारतीय गुप्तचर प्रमुख गोयलसँग प्रचण्डको भेट नभएको जनाएको छ ।

विज्ञप्तीमा भनिएको छ–‘ नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ का बारेमा केही अनलाइन मिडियाहरुमा ‘प्रचण्ड र माधव नेपालसँग रअका प्रमुख गोयलको गोप्य भेट, बिहीबार मात्रै दिल्ली फर्कने’ शीर्षकमा प्रकाशित समाचारप्रति हाम्रो सचिवालयको गम्भीर ध्यानाकर्षण भएको छ ।  

सम्वेदनशील बिषयमा झुट, कपोलकल्पित र भ्रामक समाचारप्रति खेद प्रकट गर्दै आम जनसमुदाय तथा सञ्चार जगतलाई भ्रममा नपर्न समेत अपिल गरिएको छ ।