सांसदहरुलाई दसैँ भत्ता : तीन करोड स्वाहा

काठमाडौँ । दुई अक्षरको एउटा शब्द लाज । त्यही लाज नभएपछि जसले जे गरेपनि हुँदोरहेछ । जनताको पक्षमा सिन्को भाँच्न नसकेको ओली सरकारले लाज पचाएर सरकारी ढुकुटीबाट सांसदहरुलाई तीन करोड रुपैयाँभन्दा बढी रकम दसैँ भत्ता भन्दै ह्वारह्वार्ती बाँडिरहेको छ । 

कमाउनिष्टमा रुपान्तरण भएको कम्युनिष्ट सरकारले जनतालाई राहत दिनुको साटो सांसदहरुलाई दसैँ भत्ता बाँडेर भोकले मर्ने हालतमा पुगेका जनतालाई नै आहत बनाउने काम गरेको छ । जनताको उपचार हुने वीर अस्पतालमा अक्सिजन प्लान्ट मर्मत गर्न सरकारले ३५ लाख रुपैयाँ निकासा नगर्दा ६ महिनादेखि बिरामी मर्कामा परेका छन् ।

सरकारले गत वर्ष निर्णय गरी सांसदहरुलाई दसैँ भत्ता उपलब्ध गराउन थालेको हो । त्यतिबेला पनि लाज पचाएर दसैँ भत्ता हसुरेका सांसदहरुले यस वर्ष त लाज मान्नु पर्ने थियो तर मानेनन् । कोरोना भाइरस (कोभिड १९) को महामारीले देशलाई यसरी जकडिसकेको छ कि जनताले उपचार नपाएर मर्नु पर्ने अवस्था आइसकेको छ । अस्पतालमा आइसियू र भेन्टिलेटर खाली छैनन् । थप आइसियू र भेन्टिलेटरको जोहो गर्नु पर्ने दायित्व बोकेको सरकार भने सरकारी अस्पतालमा अक्सिजनको जोहो गर्न समेत असफल भएको छ । 

संसद् सचिवालयका अनुसार सबैजसो सांसदहरूले असोजको अन्तिम साता दसैँ पेस्की पाएका छन् । संसदबाट दसैँ खर्चवापत तीन करोड सात लाख ५४ हजार रुपैयाँ वितरण भइसकेको छ । सांसदहरुले एक महिनाको थप तलब दसैँ भत्ताका रुपमा बुझेका हुन् ।

राष्ट्रिय सभा सदस्य नारायणकाजी श्रेष्ठले मात्र दसैँ भत्ता लिएका छैनन् । उनले कोभिड महामारी नियन्त्रण नभएसम्म आफ्नो नियमित तलब पनि बन्द गरिदिन भन्दै संसद् सचिवालयलाई पत्र लेखेका थिए । चैतयता उनले तलब लिएका छैनन् ।