धोनी र रैनाले लिए अन्तर्राष्ट्रिय क्रिकेटबाट सन्यास

एजेन्सी ।  भारतीय क्रिकेट टोलीका पूर्व कप्तान महेन्द्रसिंह धोनीले अन्तर्राष्ट्रिय क्रिकेटबाट सन्यास लिएका छन् । धोनीले शनिबार सामाजिक संजालबाट सन्यास लिएको  घोषणा गरेका हुन् । धोनीसंगै सुरेश रैनाले पनि अन्तर्राष्ट्रिय क्रिकेटबाट सन्न्यासको घोषणा गरेका हुन् ।

धोनीले शनिबार साँझ इन्स्टाग्राममा लेखेका छन्, ‘अहिलेसम्मको माया र समर्थनका लागि धन्यवाद । ७ बजेर २९ बजेपछि मलाई रिटायर्ड खेलाडीका रुपमा लिनुहोला ।’ उनले आफ्नो करियरको विभिन्न आरोह–अवरोहलाई ‘मैं पल दो पलका शायर हूं’ गीतसहितको भिडियो बनाएर समेत ईन्सटाग्राममा सेयर गरेका छन् ।

क्रिकेट अति लोकप्रिय खेल रहेको भारतमा धोनीलाई सफल कप्तानका रुपमा हेरिन्छ । धोनीकै कप्तानीमा भारतले सन् २००७ मा ट्वान्टी–२० विश्वकप, सन् २०११ मा एकदिवसीय विश्वकप र सन् २०१३ मा आईसीसी च्याम्पियन्स ट्रफी जितेको थियो । धोनीले अन्तिम पटक सन् २०१९ को विश्वकप क्रिकेटको सेमिफाइनलमा न्युजिल्याण्डविरुद्धको खेल खेलेका थिए । जुन खेल भारतले हारेको थियो ।

धोनीले टेस्ट क्रिकेटबाट भने सन् २०१५ को सुरुवातमै सन्यासको घोषणा गरेका थिए । धोनीले सन् २००४ मा भारतीय टिममा डेब्यु गरेका थिए । डेब्यु गरेको ३ वर्षमै उनलाई ट्वान्टी–२० टिमको कप्तानी दिइएको थियो । त्यस्तै इन्डियन प्रिमियर लिगमा पनि धोनीले चेन्नई सुपर किंग्सलाई तीन पटक उपाधि दिलाएका छन् ।

धोनीले भारतीय टिमबाट ३ सय ५० एकदिवसीय म्याच खेलेका छन् जसमा उनले ५० को औसतले १० हजार ७ सय ७३ रन बनाएका छन् । एकदिवसीय क्रिकेटमा धोनीले १० शतक र ७३ अर्धशतक प्रहार गरेका छन् । विकेटकिपरमा रुपमा धोनीले ३ सय २१ क्याच समातेका छन् भने १ सय २३ जना खेलाडीलाई स्टम्प आउट गरेका छन् ।

त्यस्तै धोनीले ट्वान्टी–२० क्रिकेटमा धोनीले भारतबाट ९८ म्याच खेलेका छन् । उनले ट्वान्टी–२० मा एक हजार ६ सय १७ रन बनाएका छन् । त्यस्तै टेस्ट क्रिकेटमा धोनीले ९० खेलमा ३८ रनभन्दा बढीको औसतमा ४ हजार ८ सय ७६ रन बनाएका छन् । टेस्ट क्रिकेटमा धोनीले २ सय ५६ वटा क्याच समातेका छन् भने ३८ पटक स्टम्प आउट गराएका छन् । ट्सम्यानका रुपमा उनले टेस्ट क्रिकेटमा ६ शतक र ३३ अर्धशतक प्रहार गरेका छन् । 

धोनीले सन्यासको घोषणा गरेको एक घन्टा बित्न नपाउँदै ३३ वर्षीय सुरेश रैनाले यो निर्णय लिएका हुन् । धोनीले सन्यास लिएपछि आफूले पनि लिएको रैनाले जनाएका छन् । रैनाले ३३ वर्षको उमेरमा भारतीय टोलीबाट सन्न्यास लिएका हुन् । रैनाले भारतीय टोलीबाट १८ टेष्ट, २ सय २६ ओडिआई र ७८ टि२० आई खेलेका छन् । रैनाले टेष्टमा श्रीलंकाविरुद्ध सन् २०१० टेष्टमा डेब्यु गरेका थिए । ओडिआईमा रैनाले सन् २००५ मा श्रीलंकाविरुद्धनै डेब्यु गरेका थिए । सन् २००६ मा दक्षिण अफ्रिकाविरुद्ध रैनाले टि२० आईमा डेब्यु गरेका थिए ।

एकदिवसिय खेलमा रैनाले ५ शतक र ३६ अर्ध शतकका साथ ५ हजार ६ सय १५ रन बनाएका छन् । टि२० आईमा १ शतक र ५ अर्ध शतक सहित कुल १६ सय ५ रन बनाएका छन् । रैना टि२० आईमा शतक प्रहार गर्ने भारतका पहिलो र विश्वका तेस्रा ब्याट्सम्यान हुन् ।