एमाले नेता कर्ण थापालाई पार्टी कार्यालयमै दुर्व्यवहार

काठमाडौं । नेकपा एमालेले एघारौँ महाधिवेशनका लागि आइतबार केन्द्रीय कार्यालय च्यासलमा लोगो सार्वजनिक गर्ने कार्यक्रम राख्यो ।

उक्त कार्यक्रममा अध्यक्ष केपी शर्मा ओली, वरिष्ठ उपाध्यक्ष ईश्वर पोखरेलसहितका नेता पनि पुगेका थिए । त्यही कार्यक्रममा पछिल्लो समय ओलीको कडा आलोचना गरिरहेका स्थायी कमिटी सदस्य कर्णबहादुर थापा पनि सहभागी थिए ।

आइतबार दिउँसो भएको उक्त कार्यक्रममा सहभागी हुन ओली आएपछि थापा पनि च्यासलस्थित तुलसीलाल स्मृति प्रतिष्ठानको भवनको माथिल्लो तलामा उक्लिए ।

थापालाई देखेपछि ओलीले कार्यक्रममा जाऊँ भन्दै इशारा गरेर बोलाए । ओलीले अंगालेको विचारसँग मतभेद रहे पनि थापा उनको पछि पछि लाग्न खोजे ।

तर त्यहीबेला ओलीको सुरक्षा गार्ड बनेर अघिपछि लाग्ने एकजनाले थापालाई रोक्दै धकेलिदिए । झन्डै झन्डै लडिसकेका थापाले त्यहीँ तत्कालै प्रतिकार गरे । ओली अगाडि बढिरहेका बेला सुरक्षागार्डको भूमिकामा देखिएकाहरूले थापालाई कुहिनाले छेक्दै धकेलिदिएका थिए ।

त्यसरी धकेलेपछि प्रतिकारमा उत्रिएका थापामाथि निलो ज्याकेट र चश्मामा देखिएका ती युवक झनै खनिन्छन् । प्रहरीकै शैलीमा स्कर्टिङमा खटिएका उनले थापालाई धकेलेन् मात्रै, सवाल-जवाफ गर्दै थर्काउन पनि खोजे ।

थापाले के भने ?

यसबारे बुझ्न खोज्दा थापाले सामान्य रुपमा लिनुपर्ने बताए । उनले उक्त कार्यक्रममा सहभागी हुन जाँदा ओलीले बोलाएपछि अघि बढेका बेला धकेल्दै रोक्ने काम भएको बताए ।

‘घटना त ठूलो होइन तर अहिले महाधिवेशन लागेको अवस्थामा अर्को अर्थ लाग्ने भयो’, थापाले भने, ‘अध्यक्ष ओलीले नै बोलाएपछि जान खोज्दा मलाई त्यसखालको व्यवहार कार्यालयमै भयो। मैले तत्कालै त्यहीँ प्रतिकार गरेको छु ।’