कोशीमा मुख्यमन्त्री हिक्मत कार्कीको कन्तविजोग, महाधिवेशन प्रतिनिधिमा सल्लाहकार देखि स्वकीय सचिवसम्म पराजित

काठमाडौं । नेकपा एमालेको आगामी महाधिवेशनका लागि प्रतिनिधि चयन गर्न शनिबार भएको निर्वाचनमा कोशी प्रदेशका मुख्यमन्त्री हिक्मतकुमार कार्कीको कन्तविजोग देखिएको छ ।

ओलीको पूर्वमा बलियो खम्बाका रुपमा देखिएका कार्कीका जनसम्पर्क सल्लाहकार, स्वकिय सचिवलगायत नेताहरु नै महाधिवेशन प्रतिनिधि चयन हुन नसकी पराजित हुन पुगेका छन् । 

यसले एमालेभित्रको अबको महाधिवेशन रोचक बन्ने संकेत देखिएको छ । मुख्यमन्त्री कार्कीका जनसम्पर्क सल्लाहकार रवि खनाल सुनसरी १ बाट महाधिवेशन प्रतिनिधि बन्न चुनावी मैदानमा थिए । तर उनी त्यहाँ पराजित भएका छन् ।

सुनसरीको क्षेत्र नम्बर १ बाट खनाल युबातर्फको प्रतिनिधि बन्न उम्मेदवार बनेका थिए । तर, त्यहाँ उनलाई दिवस बान्तवा राईले सर्मानक हार चखाएका छन् । राई ८८७ मतसहित विजयी बन्दा खनालले जम्मा २५९ मत मात्र प्राप्त गरेर तेस्रो भएका छन् । कोशी प्रदेशका पूर्वमुख्यमन्त्री भीम आचार्यका स्वकीय सचिव अनिल राजधामीले  ५१७ मत प्राप्त गरी दोस्रो भएका थिए ।

निर्वाचनको पूर्वसन्ध्यामा उम्मेदवारी फिर्ताको दबाबसहित राजधामीमाथी कुटपिट समेत भएको थियो । उनलाई उम्मेदवारी फिर्ताको कागजमा जबरजस्ती हस्ताक्षरसमेत गराइएको थियो । सो घटना सार्वजनिक भएपछि भने निर्वाचन गरियो । तर, खनालको शर्मानाक हार भयो ।

खनाल मुख्यमन्त्री कार्कीका विश्वास पात्र र निकट सहयोगी हुन् । कार्की प्रदेश सरकारको आन्तरिक मामिला तथा कानुन मन्त्री हुँदा खनाललाई कुनै नियुक्ति बिना लामो समय सचिवालयमा राखेका थिए । सो विषय सार्वजनिक भएपछि खनालकै लागि ‘म अघि बढ्छु’ भन्ने वार्षिक ५ करोडको कार्यक्रम बनाएर कार्यक्रम संयोजक नियुक्त गरिएको थियो ।

कार्की मुख्यमन्त्री नियुक्त भएपछि भने खनाल जनसम्पर्क सल्लाहकारको रुपमा कार्यरत छन् । जनसम्पर्क सल्लाहकार भएपनि प्रदेश सरकारका काम कारबाही र गतिविधिमा उनको बलियो प्रभाव छ । मन्त्री कार्कीले खनालको सल्लाहबिना कुनैपनि काम नगर्ने भएकोले उनलाई छाया मुख्यमन्त्रीको रुपमा समेत कोशीमा चिन्ने गरिएको छ ।

संघीय सरकारले खर्च कटौती गर्ने भन्दै मन्त्री र मुख्यमन्त्रीहरूले सल्लाहकार राख्न नपाउने निर्णय गरेको छ । संघीय सरकारको निर्णयअनुसार अन्य प्रदेशका मुख्यमन्त्रीहरूले सचिवालयबाट सल्लाहकारलाई कटौती गरेका छन् । तर, कार्कीले भने खनाललाई हटाउनुपर्ने भएकै कारण संघीय सरकारको उक्त निर्णयको कडा आलोचना गर्दै आएका छन् । उनै खनाल खनाल एमाले महाधिवेशन प्रतिनिधिमा भने पराजित हुनुलाई रोचक मानिएको छ ।

त्यसो त मुख्यमन्त्री कार्कीका सल्लाहकार मात्र होइन, स्वकीय सचिव समेत पनि महाधिवेशन प्रतिनिधि चयन हुन नसकी पराजित भएका छन् । उनका स्वकीय सचिव कमल पौडेल पनि एमाले अध्यक्ष केपी ओलीकै निर्वाचन क्षेत्र झापा क्षेत्र नम्बर ५ बाट युवातर्फ उम्मेदवार भएर पराजित भएका छन् । 

सो पदमा पत्रकार समेत रहेका युवराज पौडयाल विजयी भएका हुन् । पौडेलले ९०६ प्राप्त गरे । मुख्यमन्त्री कार्कीकै गृहनगर गौरादहका बासिन्दा उनका स्वकीय सचिव कमल पौडेलले भने ४९१ मत मात्र प्राप्त गरी तेस्रो भएका छन् । सो पदमा अर्का प्रतिस्पर्धी सुशील राईले ६१७, डेन्जोङ शेर्पाले २२१ र सुजन खरेलले १७४ मत प्राप्त गरेका थिए ।

पौडेलले पनि कार्की कोशी प्रदेशको आन्तरिक मामिला तथा कानुनमन्त्री भएको बेलादेखि नै उनको स्वकीय सचिवको रुपमा काम गर्दै आएका छन् ।