नेकपा काँग्रेस आरोप–प्रत्यारोप !  कसका कारण हट्यो संविधान संसोधन विधेयक ?

काठमाडौं । बुधबार संसदको कार्यसूचिमा रहेको संविधान संसोधन प्रस्ताव एकाएक कार्यसूचिबाटै हट्यो । सरकारले नेपालको अतिक्रमित भूमि लिम्पियाधुरासम्मको भूमि समेटेर जारी गरेको राजनीतिक तथा प्रशासनिक नक्सा संविधानको अनुसूचिको निशान छापमा संसोधनका लागि जेठ ९ मा संविधान संसोधन विधेयक संसदमा दर्ता गराएको थियो ।

संसदको फुल हाउसमा टेबुल हुनका लागि विधेयक परिपक्व हुन लाग्ने ५ दिनको समयावधि सकिएर बुधबार सम्भावित कार्यसूचिमा विधेयक काननुमन्त्री डा. शिवमाया तुम्वाहाम्फेले प्रस्तुत गर्ने उल्लेख थियो । तर एकाएक विधेयक संसदमा पेश नभएपछि भारतीय सञ्चारमाध्यमले प्रधानमन्त्री ओली विधेयक पेश गर्नबाट पछि हटेको जस्ता समाचार प्रकाशन तथा प्रशारण गरिरहेका छन् । देशभित्रका सञ्चारमाध्यमले प्रतिपक्ष काँग्रेसले समय माग गरेका कारण संसोधन विधेयक संसदमा पेश हुन नसकेको समाचार प्रकाशन गरे । तर काँग्रेसले नेकपा र नेकपाले काँग्रेसलाई नै आरोप प्रत्यारोप गर्ने काम मात्र भईरहे । अखिर के हो त–यो प्रकरण ?

 किन सम्भावित कार्यसूचिमा अघिल्लै दिन उल्लेख भएको संसोधन विधेयक भोलिपल्टको संसद बैठकमा पेश हुन सकेन् ? यसभित्र काँग्रेस नेकपाका आ–आफनै तर्क छन् । भारतीय सञ्चारमाध्यमका आफ्नै तर्क छन् । संसदीय एजेण्डाबाट संविधान संशोधन हटाउँदा दलहरूबीच एकअर्का तर्फ औंला उठाईरहेका छन् । जबकि नेकपाले काँग्रेसलाई थप समय दिन एजेन्डा हटाइएको भन्यो भने विपक्षीले यो सत्ता पक्षले संशोधनमा ढिलाइ गरिरहेको छ ।

सत्तारुढ दलका नेताहरू र संसद सचिवालयका पदाधिकारीहरू भन्छन्, प्रमुख विपक्षी नेपाली काँग्रेसको अनुरोधमा एजेन्डा हटाइएको थियो, किनकि काँग्रेसले मंगलबारको सर्वदलीय बैठकमै केन्द्रीय कार्यसमितिको बैठकमा संशोधनबारे छलफल गर्न थप समय मागेको थियो । ‘यो सभामुखको निर्णय अनुसार हटाईएको थियो । हामीलाई भनिएको थियो कि काँग्रेसले समय माग गरेको र त्यही काँग्रेसको अनुरोधका कारण संसोधन विधेयक हटाईएको थियो,–संसद सचिवालयका एक अधिकारीले सफलखबरसँग भने ।

यद्यपि नेपाली काँग्रेस नेताहरुले भने मंगलबार नै सर्वदलीय बैठकमा नेकपाका संसदीय दलका उपनेता सुवास नेम्वाङले बुधबार संसोधन विधेयक अगाडी बढ्दैन भन्ने जानकारी दिएको बताए । ‘त्यसकारण हामीलाई मंगलबार नै लागिसकेको थियो, सत्तारुढ दल नेकपाले नै बुधबार प्रस्ताव अगाडी बढाउदैंन,’ काँग्रेसका ति नेताले भने । काँग्रेसले सर्वदलीय बैठकमा समय माग गरेपछि नै संसदमा बुधबार सत्तापक्षलाई पनि संसोधन विधेयक अगाडी नबढाउनलाई सहयोग पुगेको थियो । जसका अपजस काँग्रेसले पाईरहेको छ ।

काँग्रेस केन्दीय सदस्य गगन थापा लगायतले बुधबार बिहान देउवालाई संविधान संशोधन प्रस्तावमा पार्टीको अडानबारे अवगत गराउन आग्रह गरेको थियो । हिजो दिउँसो थापाले ट्वीट गर्दै भनेका थिए,– राजनीतिक नक्शाको संवैधानिक संशोधनको पक्षमा खडा हुने पार्टी नेतृत्वको निर्णयलाई औपचारिक स्वामित्वका लागि केन्द्रीय समितिको बैठक बोलाउनु भोलि नै बोलाउनुपर्छ र फाष्ट ट्रयाकबाट पारित गरेर जानुपर्छ । 

अहिले जे भएपनि नक्सा संसोधनबाट पछाडी हट्न कुनै पनि दललाई ठाँउ छैन् । जनताको राष्ट्रिय स्वाधिनताको भावनासँग खेल्न सक्ने अवस्था छैन् । तसर्थ, पनि संविधान संसोधन केही दिन पछि धकेलिएला तर पारित नगरी नहुने प्रेसरमा दलहरु पनि उत्तिकै छन् ।