नक्कली भुटानी शरणार्थी प्रकरण: थप अनुसन्धान अघि बढाउन नारायणकाजी श्रेष्ठको आग्रह

काठमाडौ । नेपाली कम्युनिस्ट पार्टी (नेकपा) का नेता नारायणकाजी श्रेष्ठले नक्कली भुटानी शरणार्थी प्रकरणमा काठमाडौँ जिल्ला अदालतले गरेको फैसलाको स्वागत गर्दै घटनासँग जोडिएका अन्य शंकास्पद व्यक्तिमाथि पनि अनुसन्धानलाई निरन्तरता दिन सरकारको ध्यानाकर्षण गराएका छन्।

बुधबार सामाजिक सञ्जालमार्फत धारणा सार्वजनिक गर्दै श्रेष्ठले आफू उपप्रधानमन्त्री तथा गृहमन्त्री रहेका समयमा केन्द्रीय अनुसन्धान ब्युरो (सीआईबी) ले उक्त प्रकरणमा विस्तृत अनुसन्धान गरी मुद्दा दायर गरेको उल्लेख गरेका छन्। अदालतको पछिल्लो निर्णयले मुलुकको प्रतिष्ठामा नकारात्मक असर पारेको घटनालाई कानुनी निष्कर्षतर्फ लैजान महत्वपूर्ण भूमिका खेलेको उनको भनाइ छ।

श्रेष्ठका अनुसार अनुसन्धानबाट प्रमाणित भएका व्यक्तिविरुद्ध मात्रै अभियोग दर्ता गरिएको थियो। यद्यपि, अन्य केही व्यक्तिहरू पनि शंकाको दायरामा रहेकाले उनीहरूमाथिको अनुसन्धान खुला राखिएको थियो।

उनले कानुनी समयसीमाका कारण प्रारम्भिक चरणमा पुष्टि भएका व्यक्तिलाई मात्रै मुद्दा दायर गर्नुपरेको उल्लेख गर्दै अब सम्बन्धित निकायले बाँकी पक्षबारे पनि निष्पक्ष, गहिरो र तथ्यमा आधारित अनुसन्धान अघि बढाउनुपर्ने आवश्यकता औंल्याएका छन्।

काठमाडौं जिल्ला अदालतले मंगलबार नक्कली भुटानी शरणार्थी प्रकरणका अधिकांश आरोपितलाई दोषी ठहर गरेको थियो।