लुम्बिनीमा चार मन्त्रालयको बजेटमाथि छलफल हुँदै

बुटवल । लुम्बिनी प्रदेशसभाको बैठक आज दिउँसो १ बजे बस्दै छ । बैठकमा आर्थिक वर्ष २०८३/०८४ को विनियोजन विधेयकमाथिको छलफललाई निरन्तरता दिइनेछ ।

बैठकको सुरुमा विनियोजन विधेयकमाथिको छलफलका क्रममा उठेका प्रश्नहरूको जवाफ स्वास्थ्यमन्त्री रामजीप्रसाद घिमिरे, युवा तथा खेलकुदमन्त्री सन्तोषकुमार पाण्डेय तथा मुख्यमन्त्री चेतनारायण आचार्यले दिने कार्यसूची रहेको प्रदेशसभा सचिवालयले जनाएको छ ।

त्यसपछि भौतिक पूर्वाधार विकास मन्त्रालय, ऊर्जा, जलस्रोत तथा सिँचाइ मन्त्रालय, उद्योग, पर्यटन तथा यातायात मन्त्रालय तथा आन्तरिक मामिला तथा कानुन मन्त्रालयसँग सम्बन्धित विनियोजन शीर्षकहरूमाथि छलफल हुने प्रदेशसभा सचिवालयले जनाएको छ ।

लामो समयको विवादपछि लुम्बिनी प्रदेशसभाको बजेटमाथि आइतबारदेखि छलफल चलिरहेको छ । मन्त्री कै क्षेत्रमा मात्रै बजेटको ठूलो हिस्सा गएको भन्दै प्रदेशसभा सदस्यहरूले अवरोध गर्दै आएका थिए ।