नेपाल हङकङसँग ४३ रनले पराजित

काठमाडौं । एसीसी इस्टर्न रिजन टि २० क्रिकेट प्रतियोगितामा नेपाल हङकङसँग ४३ रनले पराजित भएको छ । 

बैंककस्थित टेर्डथाई क्रिकेट मैदानमा १ सय ५५ रनको विजयी लक्ष्य पछ्याएको नेपाल १८.१ ओभरमा अल आउट हुँदै १ सय ११ रनमा समेटियो । कप्तान ज्ञानेन्द्र मल्लले ४६ र कुशल मल्ले १९, अभिनास बोहराले १२ र आरिफ शेखले १० रन बनाए । अन्य व्याट्सम्यानले दोहोरो अंक जोड्न सकेनन् ।

यसअघि टस हारेर पहिले ब्याटिङ गरेको हङकङले निर्धारित २० ओभरमा ६ विकेट गुमाएर १५४ रन बनाएको हो । हङकङका लागि ओपनर निजाकात खानले सर्वाधिक ४८ रन बनाए । यस्तै कप्तान अइजज खानले २८, हारुन अर्सदले २७, ओपनर साहिद वासिफले २६ र जेमी एटकिनसनले १७ रन जोडे ।

नेपालका लागि सन्दीप लामिछाने र सुशन भारीले २–२ विकेट लिए । ४ ओभरमा सन्दीपले २५ र सुशनले ३७ रन खर्चिए । यस्तै कुशल मल्लले ३ ओभरमा १६ रन खर्चेर १ विकेट लिए ।

नेपाल पहिलो खेलमा मलेसियासँग २२ रनले पराजित भएको थियो । नेपालले अब दुई खेल खेल्न मात्र बाँकी छ ।

यस नतिजासँगै नेपाल एसिया कप छनोटमा यसै चरणबाट नै बाहिरिने सम्भावना बढेको छ । अघिल्लो चरणको सम्भावना झिनो अंक गणितीय सम्भावना मात्रै बाँकी छ । अब नेपाल अघिल्लो चरणमा प्रवेश गर्न दुबै खेल फराकिलो अन्तरले जित्नुको साथै विपक्षीको नतिजा पनि नाटकीय रुपमा आफू अनुकुल आउनुपर्छ ।