गृहमन्त्री अर्यालद्वारा १९१ दिनको कार्यकालको उपलब्धि विवरण सार्वजनिक

काठमाडौँ । गृहमन्त्री ओमप्रकाश अर्यालले आफ्नो १९१ दिने कार्यकालका उपलब्धिहरू सार्वजनिक गरेका छन्। उनले शान्तिपूर्वक निर्वाचन सम्पन्न गर्नु र सुशासनको कार्यान्वयनलाई प्रमुख उपलब्धिको रूपमा उल्लेख गरेका छन्।

बिहीबार गृह मन्त्रालयले आयोजना गरेको विशेष बिदाइ कार्यक्रममा मन्त्री अर्यालले आफ्नो कार्यकाल चुनौतीपूर्ण अवस्थाको बीचमा सञ्चालन भएको स्मरण गराउँदै, शासन व्यवस्थामा सुधार र सेवा प्रवाहमा सुधार ल्याउनको लागि गरिएको प्रयासलाई प्राथमिकतामा राखेको बताए।

उनका अनुसार, कार्यकालमा जेन जेड जनआन्दोलनका घाइते र शहीद परिवारको राहत, शान्ति सुरक्षा व्यवस्थाको सामान्यीकरण, कानुन, मापदण्ड तथा कार्यविधिको परिमार्जन, विपद् व्यवस्थापन, मानव अधिकार र वैदेशिक सम्बन्धमा समन्वय, साथै ऐतिहासिक निर्वाचन सुचारु गर्न केन्द्रित काम गरिएको थियो।

मन्त्रालयमा उपलब्धिहरूको हस्तान्तरण गर्दै उनले बताए कि आन्दोलनका क्रममा ४२ जना सुशासन संलग्न व्यक्तिलाई ‘सुशासन योद्धा’ घोषणा गरिएको र तीन प्रहरीलाई शहीद घोषणा गरिएको छ। घाइतेहरूको वर्गीकरण गरी जीविकोपार्जन भत्ता उपलब्ध गराइएको तथा ४६५ सरकारी कार्यालयको पुनर्निर्माण गरी सेवा सुचारु गरिएको उल्लेख उनले गरे।

कार्यक्रममा गृहसचिव राजकुमार श्रेष्ठले मन्त्री अर्यालको नेतृत्वमा छोटो अवधिमा दुई दर्जनभन्दा बढी कानुन परिमार्जन र तर्जुमा गरिएको, साथै सुरक्षा निकायको मनोबल उच्च राख्न महत्वपूर्ण भूमिका निर्वाह गरिएको भन्दै उनको कार्यशैलीको प्रशंसा गरे।

अर्याल २०८२ भाद्र ३० गते गृहमन्त्रीको जिम्मेवारी सम्हालेका थिए।