मध्यरातमा माधव नेपाल किन उडे ट्युनिसीया ?

काठमाडौं । पूर्वप्रधानमन्त्री तथा नेकपाका वरिष्ठ नेता माधव नेपाल ट्युनिसीया पुगेका छन् । २६ गते मध्यरातमा उनी पार्टीका अर्का केन्द्रीय सदस्य बलराम बास्कोटालाई साथमा लिएर ट्युनिसीया हान्निएका हुन् । उनी नेकपाका विदेश मामिला विभाग प्रमुख पनि हुन् ।

कतार हुँदै नेपाल त्यसतर्फ प्रस्थान गरेका हुन् । शनिबार मध्यरात २ बजे नेताद्वय कतार एयरवेजको प्लेनमा त्यसतर्फ प्रस्थान गरेको नेकपाले जनाएको छ । नेपालको विदेश भ्रमण भइँरहँदा नेपालभित्र भने उनलाई ललिता निवास प्रकरणमा दोषी करार गरेर अख्तियारले मुद्दा दर्ता नगरेको भद्र प्रतिपक्षी कांग्रेसलगायतले आलोचना गरिरहेको छ ।

प्रधानमन्त्री निवाससँगै रहेको बालुवाटारको ललिता निवासको सरकारी जग्गा भू–माफियाहरूलाई फाइदा पुग्ने गरी गरिएको मन्त्रिपरिषद्को निर्णय गराउने बेला माधव नेपाल प्रधानमन्त्री थिए ।
प्रधानमन्त्री निवासभित्रको जग्गा मोही र जग्गाधनीलाई सट्टापट्टा दिने प्रस्ताव लैजाने तालुकदार मन्त्रालय भौतिक योजना होइन, भूमिसुधार मन्त्रालय हो । तर कांग्रेसका नेता गच्छदारले उक्त प्रस्ताव लैजानु र त्यसबेलाको दुई निर्णय माधव नेपालले प्रधानमन्त्रीको हैसियतमा गरेका कारण माधव नेपाल प्रति पनि यो प्रकरणमा अहिले औला उठिरहेको छ ।

तत्कालीन भौतिक योजनामन्त्री विजय गच्छदारले प्रस्ताव मन्त्रिपरिषदमा लगेका थिए । भौतिक योजना सचिवका रूपमा उक्त प्रस्ताव दीप बस्नेतले तयार गरेका थिए । त्यही भएर अख्तियारले गच्छदार र बस्नेतविरूद्ध पनि मुद्दा दायर गरेको हो । तर कांग्रेसले अहिले नेकपा सरकारको छायाँमा अख्तियार रहेको र उसले पूर्वाग्रहका आधारमा नेकपा नेताहरुलाई काखमा राखेर अन्यलाई छानीछानी मुद्दा चलाएको आरोप लागिरहेको छ ।

प्रतिपक्षी कांग्रेसले सडकमै ‘नेपाल–पौडेल ओलीका यार, गच्छेदार अख्तियारका मतियार’ भन्ने नारा उरालिरहेका छन् भने सदनमा पनि उसले निरन्तर अवरोध गर्दै आइरहेको छ । तर हिजो बसेको कांग्रेस पार्टी केन्द्रीय समितिले सदनको अवरोध खोलेर गच्छेदारले कानुनी झमेलाको सामना गर्ने र अख्तियारको पूर्वाग्रहका विरुद्ध भने आवज उठाउने गरी निर्णय लिएको छ । यो निर्णयपछि आजका लागि बोलाइएको संसद बैठक भने सुचारु हुने संकेत देखिएको छ ।

अख्तियारले ललिता निवास प्रकरणमा कांग्रेस उपसभापति विजय गच्छेदारसहित १७५ माथि मुद्दा चलाउँदै गर्दा नेकपाका नेताहरु माधव नेपाल र बालुवाटारमा आठ आना जग्गा किनेका विष्णु पौडेललाई भने कारवाहीको दायरामा नपारिएको आरोप कांग्रेसलगायतले लगाइरहेका छन् ।

२६ गते बिहान विराटनगर पुगेका नेकपा वरिष्ठ नेता नेपालले उक्त जग्गा प्रकरणमा आफनो दोष नरहेको प्रष्टिकरण दिएका थिए । त्यही दिन उनी बिहान विराटनगर पुगेको र साँझ काठमाडौं फर्केर मध्यरात २ बजे ट्युनिसीयाका लागि उडेका हुन् । उनी ट्युनिसीयामा हुन लागेको एक अन्तर्राष्टिय सेमिनारमा सहभागी हुनका लागि त्यसतर्फ लागेको नेकपाले जनाएको छ । नेता नेपाल फागुन ५ गतेमात्र स्वदेश फर्किने गरी त्यसतर्फ लागेका हुन् ।