कास्की- २ मा दुई उम्मेदवारले अझै खाता खोल्न सकेनन्

काठमाडौं । प्रतिनिधि सभा सदस्यका लागि उपनिर्वाचन भएको कास्की–२ मा दुई उम्मेदवारले अझै खाता खोल्न सकेका छैनन् ।
कुल २१ जनाले उम्मेदवारी दिएको सो क्षेत्रमा २५ हजार १९० मत गणना भइसक्दा समेत स्वतन्त्र उम्मेदवार उमनाथ गौतम र यज्ञप्रसाद पंगेनीले मतको खाता खोल्न नसकेका हुन् ।

नेपाली काँग्रेसका उम्मेदवार खेमराज पौडेलको तुलनामा नेकपा उम्मेदवार विद्या भट्टराई झण्डै दोब्बर मतले अगाडि छिन् । 

सो क्षेत्रमा १० स्वतन्त्र उम्मेदवारमध्ये हालसम्म सबैभन्दा बढी मत कमलजङ्ग कुँवरले ल्याएका छन् । उनले ३५ मत हासिल गरिसकेका छन् । 

राजनीतिक दलमध्ये हालसम्म देशभक्त समाजले सबैभन्दा कम मत हासिल गरेको छ । सो दलका उम्मेदवार वीरबहादुर विश्वकर्माले यो समाचार तयार पार्दासम्म जम्मा ३ मत हासिल गरेका छन् ।