ट्रम्पको ४८ घण्टे धम्कीमा इरानको प्रतिक्रिया : 'तिमीहरूका लागि नर्कको ढोका खुल्नेछ

एजेन्सी । अमेरिकी राष्ट्रपति डोनाल्ड ट्रम्पले इरानलाई दिएको ४८ घण्टाको धम्कीपूर्ण चेतावनीपछि इरानको खातम अल-अम्बिया सेन्ट्रल हेडक्वार्टरले प्रतिक्रिया दिएको छ।

शनिबार ट्रम्पले इरानलाई सम्झौता गर्न वा 'होर्मुज स्ट्रेट' खोल्नका लागि दिएको १० दिनको समयसीमा समाप्त हुन लागेको बताएका थिए। उनले चेतावनी दिँदै भनेका थिए, 'समय सकिँदैछ। इरानमाथि कहर बर्सिन अब मात्र ४८ घण्टा बाँकी छ।' ट्रम्पको यस टिप्पणीपछि इरानी सैन्य कमाण्डरहरू आक्रामक रूपमा प्रस्तुत भएका हुन्।

बीबीसी फारसी सेवाका अनुसार, ट्रम्पको धम्कीको जवाफ दिँदै खातम अल-अम्बिया सेन्ट्रल हेडक्वार्टरका कमाण्डर मेजर जनरल अली अब्दुल्लाहीले अमेरिकी आक्रमणको स्थितिमा कडा प्रतिशोध लिने चेतावनी दिएका छन्। उनले यदि अमेरिकाले आक्रमण गरेमा इरानले अमेरिकी सेनासँग सम्बन्धित सबै पूर्वाधारहरू र इजरायली शासनसँग जोडिएका संरचनाहरूमा निरन्तर हमला गर्ने स्पष्ट पारेका छन्।

मेजर जनरल अब्दुल्लाहीले अगाडि भने, 'हामीले जहिले पनि जे भनेका छौँ, त्यो गरेर देखाएका छौँ। यो सन्देशको सीधा अर्थ यो हो कि तिमीहरूका लागि नर्कको ढोका खुल्नेछ।' 

यसैबीच, खातम अल-अम्बियाका प्रवक्ता कर्नल इब्राहिम जुल्फकारीले पनि एक भिडियो सन्देश जारी गरेका छन्। उनले आफ्नो सन्देशमा ट्रम्पको नाम प्रत्यक्ष रूपमा नलिए पनि क्षेत्रीय सुरक्षाका विषयमा चेतावनी दिएका छन्। जुल्फकारीले भनेका छन्, 'यो नबिर्स कि यदि बुराई फैलियो भने यो सम्पूर्ण क्षेत्र तिम्रो लागि नर्क बन्नेछ। इरानको हारको भ्रम तिम्रा लागि यस्तो दलदल बन्नेछ, जसमा तिमी आफैँ डुब्नेछौ।'