काँग्रेसभित्र सहमतिको प्रयास स्वरूप डा. कोइरालाद्वारा पाँच प्रस्ताव प्रस्तुत

काठमाडौँ । नेपाली काँग्रेसभित्र देखिएको आन्तरिक असन्तुष्टि समाधान गर्दै संगठनात्मक एकता कायम राख्ने उद्देश्यसहित नेता डा.शेखर कोइरालाले पाँच बुँदे मध्यमार्गी प्रस्ताव अघि सारेका छन्।

पार्टी सभापति गगन थापासँग निरन्तर छलफलमा रहेका कोइरालाले आगामी १५औँ महाधिवेशनलाई सहमतिमार्फत सम्पन्न गर्ने वातावरण बनाउन उक्त प्रस्ताव अघि बढाएको जनाइएको छ।

प्रस्ताव अनुसार १५औँ महाधिवेशनका लागि क्रियाशील सदस्यताको अद्यावधिकलाई अनिवार्य नबनाई १४औँ महाधिवेशनपछि नवीकरण तथा वितरण गरिएका सदस्यताकै आधारमा अधिवेशन सम्पन्न गर्नुपर्ने उल्लेख गरिएको छ।

त्यसैगरी, १४औँ महाधिवेशनबाट निर्वाचित केन्द्रीय कार्यसमिति र विशेष महाधिवेशनपछिको संरचनालाई समायोजन गरेर एकीकृत कार्यसमिति बनाउने सुझाव पनि प्रस्तावमा समेटिएको छ। कार्यसम्पादन समिति गठन गर्दा सभापति पक्षको बहुमत सुनिश्चित गर्ने तथा निर्वाचन समिति, अनुशासन समिति, विधान समिति, क्रियाशील सदस्यता छानबिन समिति लगायतका संरचना आपसी सहमतिबाट गठन गर्नुपर्ने धारणा समेत राखिएको छ।

पार्टीभित्र सहमति कायम राख्ने विषयमा सभापति थापाले पनि लचकता अपनाउने संकेत दिँदै आएका छन्। उनले पूर्वसभापति शेरबहादुर देउवा पक्ष र कोइराला समूहलाई समेटेर महाधिवेशन सम्पन्न गर्न आफू सकारात्मक रहेको बताउँदै आएका छन्।

यसैबीच, थापाले निवर्तमान सभापति पूर्णबहादुर खड्का तथा कोइरालालाई वरिष्ठ नेताको जिम्मेवारी दिन सकिने सन्देश समेत पठाइसकेको बताइएको छ। साथै, असन्तुष्टि जनाउँदै आएका १९ जना नेतालाई यसअघि नै केन्द्रीय समितिमा समावेश गरिसकिएको जनाइएको छ।