सरकार र अधिकारकर्मी रूबी खानबीच ५ बुँदे सहमति

काठमाडौँ । बाँकेकी निर्मला कुर्मीको अपहरण, शरीर बन्धक तथा कर्तव्य ज्यानसम्बन्धी घटनामा निष्पक्ष अनुसन्धानलगायत माग राख्दै २३ दिनदेखि अनशनमा रहेकी अधिकारकर्मी रूबी खानले सरकारसँग भएको सहमतिपछि आफ्नो अनशन समाप्त गरेकी छन् ।

बुधबार सरकारका प्रतिनिधि र खानबीच पाँच बुँदे सहमति भएपछि उनले अनशन तोडेकी हुन् । उनलाई प्रधानमन्त्री बालेन्द्र शाहकी प्रेस तथा अनुसन्धान विज्ञ दीपा दाहालले पानी खुवाएर अनशन समाप्त गराएकी थिइन् ।

अनशनस्थल बाँकेको नेपालगन्जस्थित सञ्जीवनी कलेज अफ मेडिकल साइन्सेज (नेपालगन्ज अस्पताल) मा सरकारका तर्फबाट विशेष वार्ता टोली खटिएको थियो । उक्त टोलीमा प्रहरी प्रधान कार्यालयका प्रहरी अतिरिक्त महानिरीक्षक सुशील सिंह राठौर, गृह मन्त्रालयका सहसचिव तथा प्रवक्ता आनन्द काफ्ले र दाहाल सहभागी थिए ।