सरकारलाई युवाको चेतावनी : ‘तिमीहरूको सरकार सडकमा ल्याउन दुई मिनेट लाग्दैन’

काठमाडौँ । काठमाडौँमा आत्मदाह प्रयास गरेका मुगुका गणेश नेपालीको उपचारका क्रममा मृत्यु भएपछि विभिन्न समूहले सरकार र स्थानीय प्रशासनको कार्यशैलीप्रति असन्तुष्टि जनाउँदै प्रदर्शन गरेका छन्।

नेपालीले बिहीबार राहदानी विभाग अगाडि आफ्नो शरीरमा पेट्रोल छर्केर आगो लगाएका थिए। घटनापछि उनलाई उपचारका लागि वीर अस्पताल लगिएको थियो। उपचारकै क्रममा शुक्रबार उनको निधन भएको हो।

काठमाडौँ महानगरपालिकाका नगर प्रहरीले पार्किङ निषेधित क्षेत्रमा मोटरसाइकल राखेको विषयमा ‘ह्विल लक’ गरी जरिवाना गरेको घटनापछि नेपाली असन्तुष्ट बनेको बताइएको छ। महानगरको कारबाहीस्वरूप १० हजार रुपैयाँ जरिवाना तिर्नुपरेको विषयलाई लिएर उनले आत्मदाहको प्रयास गरेको प्रारम्भिक विवरण सार्वजनिक भएको छ।

नेपालीको मृत्युको खबरपछि सर्वसाधारण, चालक तथा राइडर समूहका व्यक्तिहरू शुक्रबार काठमाडौँको माइतीघर मण्डलामा भेला भएका थिए। उनीहरूले सरकार र स्थानीय प्रशासनको कामकारबाहीप्रति असहमति जनाउँदै प्रदर्शन गरेका छन्।