तरलता व्यवस्थापनका लागि ४० अर्ब रुपैयाँ संकलन गर्ने राष्ट्र बैंकको तयारी

काठमाडौँ। वित्तीय प्रणालीमा बढ्दो तरलता नियन्त्रण गर्न नेपाल राष्ट्र बैंकले पुनः निक्षेप संकलन उपकरणमार्फत ठूलो परिमाणमा रकम खिच्ने भएको छ। यसपटक केन्द्रीय बैंकले बैंक तथा वित्तीय संस्थाबाट ४० अर्ब रुपैयाँ संकलन गर्ने तयारी गरेको हो।

बैंकिङ क्षेत्रमा कर्जा विस्तार सुस्त रहँदा प्रणालीमा अतिरिक्त तरलता कायम भएपछि राष्ट्र बैंकले १६० दिन अवधिका लागि उक्त रकम संकलन गर्न लागेको जनाएको छ। हाल बैंक तथा वित्तीय संस्थाहरूले करिब ३ प्रतिशत ब्याजदरमा केन्द्रीय बैंकलाई रकम उपलब्ध गराइरहेका छन्।

राष्ट्र बैंकले बजारमा देखिएको तरलता असन्तुलन तथा ब्याजदर व्यवस्थापनलाई लक्षित गर्दै निक्षेप संकलन उपकरण र स्थायी निक्षेप सुविधा प्रयोग गर्दै आएको छ। प्रस्तावित बोलकबोल प्रक्रियामा राष्ट्र बैंकबाट अनुमति प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरूले मात्र सहभागिता जनाउन पाउने व्यवस्था गरिएको छ।