‘बुढीगण्डकी आयोजना अघि बढाउने पहल सकारात्मक’ : डा. बाबुराम भट्टराई

काठमाडौँ। पूर्वप्रधानमन्त्री डा. बाबुराम भट्टराईले बुढीगण्डकी जलविद्युत् आयोजनालाई पुनः सक्रिय बनाउने सरकारी पहललाई सकारात्मक संकेतका रूपमा मूल्यांकन गरेका छन्।

उनले लामो समयदेखि अनिश्चितता र विभिन्न आशंकाबीच रहेको उक्त राष्ट्रिय गौरवको आयोजना पुनः अघि बढाउन गरिएको प्रयासलाई सुधारको अवसरका रूपमा लिनुपर्ने बताएका छन्। विगतका कमजोरी सच्याउँदै योजनालाई प्रभावकारी रूपमा अगाडि बढाउन सकिने सम्भावना रहेको उनको धारणा छ।

भट्टराईका अनुसार देशको केन्द्रीय भूभागमा अवस्थित यो आयोजना केवल विद्युत् उत्पादन (करिब १२०० मेगावाट) मा सीमित नभई बहुआयामिक आर्थिक रूपान्तरणसँग जोडिएको परियोजनाका रूपमा हेर्नुपर्ने आवश्यकता छ। राजधानी काठमाडौँसहित प्रमुख सहरहरू बीचको रणनीतिक अवस्थिति रहेको कारण यसको प्रभाव ऊर्जा क्षेत्रभन्दा बाहिरसमेत विस्तार हुनसक्ने उनले उल्लेख गरेका छन्।

उनले इतिहासमा आर्थिक रूपान्तरणका निर्णायक चरणहरूमा यस्तै प्रकृतिका ठुला पूर्वाधार परियोजनाहरूलाई प्राथमिकता दिएर कार्यान्वयन गरिएको उदाहरण दिँदै नेपालमा पनि यस्ता पहल आवश्यक रहेको बताएका छन्।

साथै, सम्बन्धित उच्च पदाधिकारीहरूमा उक्त आयोजनाको महत्त्वबारे स्पष्ट समझ विकसित हुने अपेक्षा व्यक्त गर्दै उनले यसलाई सामान्य जलविद्युत् परियोजनाभन्दा फरक, रूपान्तरणकारी योजनाका रूपमा अगाडि बढाउनुपर्ने बताएका छन्।

भट्टराईले परियोजना कार्यान्वयन र व्यवस्थापनका लागि प्राधिकरण संरचनामा विशेष ध्यान दिनुपर्ने सुझाव दिएका छन्। विद्युत् प्राधिकरणअन्तर्गतको साधारण संरचनाभन्दा अलग, छुट्टै कानुनी आधारमा स्थापित अधिकार सम्पन्न निकायमार्फत बहुउद्देश्यीय ढाँचामा सञ्चालन नगरे योजनाले अपेक्षित परिणाम नदिने जोखिम रहने उनले बताएका छन् ।