अमेरिकी उच्च अधिकारी नेपाल आएलगत्तै भारतीय उच्च अधिकारीको पनि भ्रमण

काठमाडौं । प्रधानमन्त्री बालेन्द्र शाह (बालेन) नेतृत्वको सरकार गठन भएपछि नेपालमा छिमेकी मित्रराष्ट्र भारत– चीन मात्रै होइन, अमेरिकासम्मको पनि चासो नेपालमा बढेको छ । 

१३ चैतमा बालेन प्रधानमन्त्री भएपछि पहिलो पटक अमेरिकी उच्च अधिकारीको भोलि (सोमबार) नेपाल भ्रमण हुन लागेको छ । अमेरिकाको दक्षिण तथा मध्य एसियाली मामिला हेर्ने सहायक विदेशमन्त्री समीर पल कपुर सोमबार (भोली) नेपाल आउँदै छन् ।  कपुर तीनदिने भ्रमणका लागि काठमाडौं आउन लागेका हुन् ।

उनीसँगै अन्य दुई अमेरिकी अधिकारी पनि भ्रमण दलमा हुने र उनले भ्रमणका क्रममा अर्थमन्त्री स्वर्णिम वाग्ले, परराष्ट्रमन्त्री शिशिर खनाल र नेपाल–अमेरिका उद्योग वाणिज्य संघका पदाधिकारी तथा सदस्य लगायतलाई भेट्ने कार्यक्रम तय भएको छ । 

यस्तै भ्रमण कपुरले बंगलादेशमा पनि गरेका थिए । बंगलबादेशमा नयाँ सरकार बनेलगत्तै उनले त्यहाँ पनि भ्रमण गरेका थिए । नेपालमा पनि नयाँ सरकार बनेपछि उनको हुन लागेको भ्रमणलाई अर्थपूर्ण रुपमा हेरिएको छ । 
उनी फर्केलगत्तै भारतीय विदेश सचिव विक्रम मिश्री पनि काठमाडौं आउने तयारीमा छन् । उनी नेपालको नयाँ सरकार, पछिल्लो विकसित राजनीतिक घटनाक्रमका विषयमा बुझन र भारत र नेपाल सरकारका बीचको प्राथमिकता क्षेत्रहरुका बारेमा छलफल गर्न नेपाल आउन लागेका हुन् । 

मिश्री भारतीय तिनै अधिकारी हुन्, जसले गत भदौं १ मा नेपाल आएर तत्कालिन प्रधानमन्त्री केपी ‌ओलीलाई भारत भ्रमणको औपचारिक निम्तो दिएका थिए । भारतसँगको चिसोपनाका कारण ओलीको भारत भ्रमण नभईरहेका बेला मिश्रीले भदौं १ मा भारतीय वायुसेनाको विमानबाट काठमाडौं आएर ओलीलाई भ्रमणको औपचारिक निम्तो गरेका थिए । 

भारतीय पक्षको निम्तोपछि ओली भारत भ्रमणमा जाने तयारी भईरहेका बेला तीन साता मै गत भदौं २३ र २४ मा नेपालमा जेनजी आन्दोलन भयो । ओली प्रधानमन्त्रीको सरकारी निवास बालुवाटारबाटै राजीनामा दिएर सेनाको हेलिकप्टरमा भाग्ने परिस्थिती निर्माण भयो । त्यसपछि संसद विघटन भएर चुनाव गराउन अन्तरिक सरकार गठन भयो । अन्तरिम सरकारले चुनाव गराएर रास्वपाको बलियो सरकार निर्माण भएको छ । 

त्यसपछि फेरि भारतीय सरकारको सन्देश बोकेर विदेश सचिव मिश्री नेपाल आउन लागेको भारतीय दूतावास स्रोतले जनाएको छ । मिश्रीको भ्रमण अप्रिल अन्तिमसम्म भईसक्ने र मे पहिलो साता रास्वपा सभापति रवि लामिछानेको भारत भ्रमण हुने गरी तयारी भईरहेको श्रोतको भनाइ छ । रवि मे ५,६ तारिखतिर दिल्ली जानेछन्   । त्यस अगाडी नै मिश्रिको नेपाल भ्रमण हुने छ ।