६ महिनाभित्र महाधिवेशन गर्ने प्रचण्डको प्रस्ताव

काठमाडौ । नेपाली कम्युनिस्ट पार्टीका संयोजक प्रचण्डले आगामी ६ महिनाभित्र पार्टीको राष्ट्रिय एकता महाधिवेशन सम्पन्न गर्ने प्रस्ताव अघि सार्नुभएको छ । 

बिहीबार पार्टी केन्द्रीय कार्यालय पेरिसडाँडामा बसेको केन्द्रीय संयोजन समितिको पहिलो बैठकमा चुनावी समीक्षा प्रतिवेदन पेस गर्दै अध्यक्ष प्रचण्डले पार्टीलाई नयाँ ढङ्गले पुनर्गठन गर्न ६ महिने समयसीमासहितको १० बुँदे ठोस कार्ययोजना प्रस्ताव गरेका हुन् । 

त्यसका लागि अबको एक महिनाभित्रै स्थानीय तहसम्मको सङ्गठन समायोजन गर्ने र तीन महिनाभित्र सबै वडाहरूमा सङ्गठन निर्माण गरिसक्ने उनको प्रस्ताव छ । सङ्गठनलाई गतिशील बनाउन आगामी तीन महिनाभित्र पार्टी सदस्यता नवीकरण गरिसक्ने र पाँच महिनाभित्र वडा, पालिका, जिल्ला हुँदै प्रदेश तहका अधिवेशनहरू सम्पन्न गरेर छैटौँ महिनामा राष्ट्रिय महाधिवेशन गर्ने प्रचण्डको कार्ययोजनामा उल्लेख छ ।

यस प्रस्तावमाथि आगामी चैत २३ गतेदेखि पार्टीमा निरन्तर छलफल हुने र त्यसपछि प्राप्त सुझावका आधारमा ठोस निर्णय गरी कार्यान्वयनको चरणमा लगिने पार्टी स्रोतले जनाएको छ ।