प्राविधिक प्रहरीतर्फ विभिन्न पदमा भर्ना खुल्यो

काठमाडौँ । नेपाल प्रहरीले प्राविधिक प्रहरी समूह अन्तर्गत रिक्त रहेका विभिन्न उपसमूहका पदहरूमा खुला प्रतियोगिताद्वारा पदपूर्तिका लागि दरखास्त आह्वान गरेको छ । प्रहरी प्रधान कार्यालय, मानवश्रोत विकास विभागले शुक्रबार सूचना प्रकाशित गर्दै प्राविधिक प्रहरी नायव उपरीक्षकदेखि प्राविधिक प्रहरी जवानसम्मका पदहरूमा नयाँ भर्ना खोलेको हो ।

प्रहरीले सूचना प्रविधि, सञ्चार, इन्जिनियरिङ (सिभिल, इलेक्ट्रिकल, अटोमोबाइल), विधि विज्ञान, स्वास्थ्य र सङ्गीत जस्ता विविध विधामा जनशक्ति माग गरेको छ । 

जसअनुसार प्राविधिक प्रहरी नायव उपरीक्षक, निरीक्षक, नायव निरीक्षक र सहायक निरीक्षक पदका लागि उम्मेदवारहरूले नेपाल प्रहरीको अनलाइन भर्ती व्यवस्थापन प्रणाली मार्फत आवेदन दिनुपर्नेछ । यद्यपि, प्राविधिक प्रहरी जवान पदका लागि भने उम्मेदवार स्वयम् तोकिएको कार्यालयहरूमा उपस्थित भई दरखास्त दिनुपर्ने प्रावधान राखिएको छ ।

अनलाइनमार्फत आवेदन दिने म्याद चैत २५ गतेदेखि २०८३ वैशाख २४ गतेसम्म तोकिएको छ भने जवान पदका लागि चैत २६ गतेदेखि वैशाख ३१ गतेसम्म दरखास्त दिन सकिनेछ । उमेरका हकमा पद अनुसार न्यूनतम १८ देखि २३ वर्ष पूरा भई अधिकतम २८ देखि ३५ वर्ष ननाघेको हुनुपर्ने प्रहरीले जनाएको छ ।