बालेनलाई मतदाताको प्रश्न- ‘तपाईँको विकास योजना के छ ?’

काठमाडौँ। झापाको कमल गाउँपालिकामा घरदैलो अभियानमा रहेका रास्वपाका वरिष्ठ नेता बालेन्द्र साह ‘बालेन’लाई मतदाताहरूले विकास योजनाबारे जिज्ञासा राखेका छन् ।

सोमबार कमल गाउँपालिकामा घरदैलोमा निस्किएका साहले आफूहरू फागुनको पहिलो सातासम्ममा सबै योजना ल्याउने बताए । अहिले तपाईँहरूको कुरा सुन्न र भावना बुझ्न आएका हौँ, उनले भने ।

“हामी पूर्वी नेपालकै ताप्लेजुङ गयौँ, खोटाङ पुग्यौँ र आज यहाँ छौँ । ठाउँअनुसारको समस्या र माग रहेकाले हामी सोहीअनुसारको योजना बनाउँछौँ”, साहले भने, “पैसा नहुनेले पनि उपचार र शिक्षा पाउनु पर्छ । पैसा हुनेले व्यापार गर्न पाउनुपर्छ ।”

स्थानीयले यहाँको विकास सम्बन्धीका समस्या, जग्गाको धनी पुर्जा र नक्साको समस्या साहसमक्ष राखेका छन् । अधिकांश ठाउँमा स्थानीयले जिज्ञासा र विभिन्न प्रश्नहरू गर्ने गरेका छन् । सबैको प्रश्न र मागलाई सचिवालयले टिपोट गरेर एकैसाथ सम्बोधन गर्ने योजना रहेको साहका सचिवालय सदस्यहरूले बताए।