'देश बनाउने टोली' भन्दै बालेनले गरे गृहमन्त्री र पूर्वाधारमन्त्रीसँगको तस्वीर सार्वजनिक

काठमाडौँ । प्रधानमन्त्री वालेन्द्र शाह (बालेन)ले गृहमन्त्री सुधन गुरुङ र भौतिक पूर्वाधारमन्त्री सुनिल लम्सालसँगको संयुक्त तस्वीर सामाजिक सञ्जालमार्फत सार्वजनिक गरेका छन् ।

आइतबार साँझ फेसबुकमा तस्वीर पोस्ट गर्दै प्रधानमन्त्री शाहले ‘प्रधानमन्त्री, गृहमन्त्री, पूर्वाधारमन्त्री -देश बनाउने टोली !’ लेखेका छन् । सार्वजनिक गरिएको तस्वीरमा प्रधानमन्त्री शाह दुवै मन्त्री सँगसँगै देखिएका छन् ।

प्रधानमन्त्रीको उक्त पोस्ट मन्त्रिपरिषद् पुनर्गठनपछि सार्वजनिक भएको हो । तस्वीरमा रहेका गृहमन्त्री गुरुङ केही दिनअघि मात्रै पुन: गृह मन्त्रालयको जिम्मेवारीमा फर्किएका हुन् । सम्पत्तिसम्बन्धी विषयमा प्रश्न उठेपछि उनले गत वैशाख ९ गते पदबाट राजीनामा दिएका थिए । त्यसयता गृह मन्त्रालयको जिम्मेवारी प्रधानमन्त्री शाह आफैंले सम्हाल्दै आएका थिए ।

गत साता मन्त्रिपरिषद्को पुनर्गठनपछि गुरुङ पुन: गृहमन्त्री नियुक्त भएका थिए भने लम्साल भौतिक पूर्वाधार मन्त्रालयको जिम्मेवारीमा छन् । दुवै मन्त्री प्रधानमन्त्री शाह निकट मानिने नेताका रूपमा समेत चिनिन्छन् ।

प्रधानमन्त्रीले सार्वजनिक गरेको तस्वीर र त्यससँगै राखिएको टिप्पणीलाई सामाजिक सञ्जालमा व्यापक रूपमा सेयर र कमेन्ट देखिएको छ । पोस्ट सार्वजनिक भएपछि प्रयोगकर्ताहरूले विभिन्न टिप्पणीसमेत गरेका छन् ।