मधेस सरकारमा यसरी मिल्यो भागबन्डा : कांग्रेसलाई मुख्यमन्त्री, जसपालाई सभामुख, नेकपालाई तीन मन्त्रालय

जनकपुरधाम । मधेश प्रदेशका नवनियुक्त मुख्यमन्त्री कृष्णप्रसाद यादवले आज पद तथा गोपनीयताको शपथ ग्रहण गर्दैछन् । एमालेका दल नेता सरोज कुमार यादवले मंसिर १७ गते राजीनामा दिएपछि कांग्रेसका यादव मुख्यमन्त्री नियुक्त भएका हुन् । 

उनलाई प्रदेश सभामा रहेका ७ राजनीतिक दलले समर्थन जनाएका छन् । उनका पक्षमा प्रदेश सभाका ७७ सांसद छन् । मुख्यमन्त्री यादवले आज पद तथा गोपनियताको सपथ लिएसँगै आजै मन्त्रीमन्डल विस्तार समेत गर्ने तयारी गरेका छन् । 

त्यसका लागि हिजो शनिबार जनकपुरमा बसेको ७ राजनीतिक दलका नेताहरुबीचमा छलफलले भागवन्डाको टुंग्गो लगाईसकेको बैठकमा सहभागी एक नेताले सफलखबरलाई बताए । उनका अनुसार, कांग्रेसले मुख्यमन्त्री पाएपछि अब प्रदेश सभाको सभामुख भने जनता समाजवादी पार्टी (जसपा)ले पाउनेछ । जसपा पनि मुख्यमन्त्रीको आकांक्षी थियो । तर अन्तिम समयमा उसले भागवन्डामा सभामुख आफुले लिएर मुख्यमन्त्री कांग्रेसलाई छोड्न तयार भएको हो । 

विगतमा कांग्रेस र एमाले एकातिर र अन्य राजनीतिक दल अर्काेतिर थिए । तर जसपाका जितेन्द्र सोनलले प्रदेश सभामा विश्वासको मत नपाउने अवस्था आएपछि राजीनामा दिँदा एमालेले कांग्रेसलाई छोडेर आफैं मुख्यमन्त्री लिने गरी अगाडी बढ्दा मधेसमा एमालेलाई गहिरो धक्का लागेको छ । 

एउटा पद लिन खोज्दा उसलाई तीन वटा पदको घाटा लागेको छ । अर्थात, त्यस अगाडीसम्म प्रदेश प्रमुख रहेका एमाले कोटका प्रमुखको पद गुमेको छ । मुख्यमन्त्रीको पद पनि गएको छ । त्यस्तै प्रदेश सभाको सभामुखको पद पनि गुमेको छ । त्यक्तिमात्रै होइन, प्रदेश सभामा कांग्रेससँग सहकार्य गरिरहेको एमाले एक्लिएको छ । कांग्रेस अन्य दलहरुसँग मिलेर सरकारको नेतृत्वमा पुगेको छ । 

त्यस आधारमा कांग्रेस, जसपा, नेकपा लगायत ७ दलले कांग्रेस दल नेताको नेतृत्वमा बनेको सरकारमा मन्त्री, सभामुख लगायत भागवन्डा टुंग्गो लगाएका छन् । भागवन्डा अनुसार, अब मुख्यमन्त्री पाएको कांग्रेसले दुई मन्त्रालय, जनता समाजवादी पार्टी (जसपा)ले सभामुखसहित दुई मन्त्रालय, नेपाली कम्युनिष्ट पार्टी (नेकपा माओवादी केन्द्र र एकीकृत समाजवादी मिलेर बनेको पार्टी) ले तीन वटा मन्त्रालय, जनमत पार्टीले दुई मन्त्रालय र लोसपाले दुई मन्त्रालय लिने गरी भागवन्डाको टुंगो लगाइएको छ ।